Surxondaryo viloyatida fuqaroning turmush o‘rtog‘i bilan ajrashish masalasini tezlashtirib bermoqchi bo‘lgan shaxs ushlandi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Ma’lum bo‘lishicha, fuqaro Sh.J. o‘zini “M.” advokatlik byurosi advokati deb tanishtirib, shu yo‘l bilan fuqaro B.ning ishonchiga kirib, uning turmush o‘rtog‘i bilan ajrashish masalasini sud tizimida ishlovchi tanishlari bilan gaplashib tez kunda hal qilib berishga va’da bergan. Evaziga 10 million so‘m so‘ragan.
Departament hamda DXXning Surxondaryo viloyati boshqarmalari tomonidan o‘tkazilgan tezkor tadbirda soxta advokat pullarni firibgarlik yo‘li bilan olgan vaqtida ashyoviy dalillar bilan ushlangan.
Holat yuzasidan Sh.J.ga nisbatan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda ikkita Captiva-4 olib berishni va’da qilib, fuqaroni 63 ming dollarga chuv tushirgan shaxsga jinoyat ishi qo‘zg‘atilgani, Andijon shahar Xalq ta’limi bo‘limi boshlig‘i 900 dollar pora olayotganida ushlangani, Farg‘onada 1200 dollar evaziga fuqaroning pasportidagi ismi va tug‘ilgan yilini o‘zgartirib berishni va’da qilgan shaxs qo‘lga olingani haqida xabar berilgan edi.
Izoh (0)