Toshkentda 8-aprel kuni Sergeli yerusti metrosida poyezd yarim yo‘lda to‘xtab qolib, yo‘lovchilar temiryo‘l bo‘ylab piyoda yurishga majbur bo‘lgani haqida xabar berilgan edi.

Foto: “Xalq so‘zi online”

“Toshshahartrans” matbuot xizmatining ma’lum qilishicha, Toshkent metropolitenining Chilonzor yo‘nalishi Sergeli qismida texnik nosozlik kelib chiqqanligi tufayli metropoliten harakati vaqtinchalik to‘xtatilganligi munosabati bilan, metropolitenning Olmazor stansiyasidan Qipchoq stansiyasigacha bo‘lgan oraliqda vaqtinchalik avtobus yo‘nalishi harakati yo‘lga qo‘yildi.

Ushbu yo‘nalishda 4-, 7-, va 12-avtobus saroylari tomonidan vaqtinchalik avtobuslar xizmat ko‘rsatmoqda. Yo‘lovchilar mazkur vaqtinchalik tashkil etilgan yo‘nalishdan bepul foydalanishlari mumkin bo‘ladi.

Foto: Telegram / “Ko dnu”

“Xalq so‘zi online” ma’lumotlariga ko‘ra, yo‘lovchilarga mazkur yo‘nalishda harakat qachon tiklanishi haqida ma’lumot berilmagan va ularga avtobuslarga chiqishga ko‘rsatma berilmoqda.

Foto: Telegram / “Ko dnu”

Ayni vaqtda “Toshkent metropoliteni” UK rahbariyati voqea joyida vaziyatning sabablarini aniqlamoqda. Toshkent metropolitenining Chilonzor yo‘nalishi (“Olmazor” — “Buyuk Ipak Yo‘li”) shtat rejimida ishlamoqda.

Avvalroq “Olmazor” yerosti metro bekatidan Sergeli yo‘nalishining “Choshtepa” yerusti metro bekati tomon harakatlanib ketayotgan 4 vagonli tarkib to‘xtab qolgan va natijada shu yo‘nalishda harakatlanib kelayotgan navbatdagi tarkib to‘xtab turgan vagonga borib urilgani to‘g‘risida xabar berilgandi.