Surxondaryo viloyatining Termiz shahrida voyaga yetmagan qizning nomusiga tegilgani bo‘yicha jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.
Ma’lum qilinishicha, 16 yoshli qizning nomusiga tegilgani yuzasidan Termiz shahar bo‘yicha IIO FMB huzuridagi TB tomonidan qo‘shimcha tekshiruv harakatlari o‘tkazilgan. Mavjud qarama-qarshiliklarni bartaraf etish va haqiqatni aniqlash maqsadida 2021-yil 11-aprel kuni holat yuzasidan Jinoyat kodeksining 118-moddasi (shaxsning 18 yoshga to‘lmaganligi aybdorga ayon bo‘lgan holda nomusga tegish) 3-qismi “a” bandi bilan jinoyat ishi qo‘zg‘atilgan.
Holat bo‘yicha sudga oid qayta komission tibbiyot ekspertizasi tayinlangan bo‘lib, to‘plangan hujjatlari Sog‘liqni saqlash vazirligining Respublika sud-tibbiyot ekspertiza ilmiy-amaliy markaziga yuborilgan.
Hozirda Surxondaryo viloyati IIB huzuridagi TB tomonidan tergov harakatlari olib borilmoqda.
Eslatib o‘tamiz, termizlik erkak 2020-yilning yanvar va fevral oyida maktab o‘quvchisini ikki marta zo‘rlagani hamda huquqni muhofaza qilish idoralari bu ishni “tinchitib” yuborgani haqida xabar berilgan edi. Senatning Mudofaa va xavfsizlik qo‘mitasi a’zosi Farhod Boqiyev ushbu jinoyatni sodir etgan shaxsga nisbatan Termiz shahar Ichki ishlar organlari faoliyatini muvofiqlashtirish bo‘limi qariyb 14 oydan buyon qonuniy choralar ko‘rilmaganini ta’kidlagandi.
Ushbu holat yuzasidan IIV huzuridagi Tergov departamenti ko‘rsatmasiga binoan mas’ul xodimlarga nisbatan xizmat tekshiruv tayinlangan.
Holat yuzasidan Gender tengligini ta’minlash bo‘yicha komissiyasi a’zosi Saida Mirziyoyeva munosabat bildirib, jinoyatchini hech qanaqasiga oqlab bo‘lmaganidek, Termiz huquqni muhofaza qilish idoralari xodimlarini ham umuman oqlab bo‘lmasligini aytgandi. Shuningdek, IIV bu holat yuzasidan surishtiruv-tergov ishlarini o‘tkazishiga va Termiz IIB xodimlari jinoyatni yashirgani uchun qonun oldida javob berishga umid qilishini ta’kidlagan.
Izoh (0)