“Ular biror yerda ishlamasin” — Shavkat Mirziyoyev videoselektorda ishdan olingan rahbarlar haqida

Prezident Shavkat Mirziyoyev raisligida 8-aprel kuni tadbirkorlikni rivojlantirish va 2021-yilda aholi bandligini ta’minlash dasturi ijrosiga bag‘ishlangan videoselektor yig‘ilishi bo‘lib o‘tdi. Davlat rahbari yig‘ilishda Qashqadaryo va Navoiy viloyatlari hokimlarining birinchi o‘rinbosarlarini lavozimidan ozod etdi.

Prezident viloyat, shahar va tuman rahbarlari joylarda kichik biznes vakillari bilan umuman muloqot qilmayotganini tanqid qilgan. “Infratuzilma yo‘q, gaz, elektr energiyasi va aylanma mablag‘ yo‘q”, — deydi davlat rahbari.

Qashqadaryo viloyati hokimining birinchi o‘rinbosari Bo‘tayev, Soliq boshqarmasi boshlig‘i Bozorov, viloyat Markaziy banki rahbari Rajabov, Navoiy viloyati hokimining birinchi o‘rinbosari Hasanov, viloyat Markaziy banki rahbari Saidov va Soliq boshqarmasi boshlig‘ining birinchi o‘rinbosari Muhammadiyev lavozimidan ozod etilsin.

Ular biror yerda ishlamasin. Ular shuncha oylik berib, shuncha harakat qilganimizni, siyosatga xiyonat qilganini bilishi kerak.

Shu bilan birga, Ulug‘nor, Uzun, Yozyovon, Dehqonobod tumanlari hokimining birinchi o‘rinbosarlari, Andijon, Oltinko‘l, Olot, Qorako‘l, Oqoltin, Chilonzor, Mo‘ynoq tumanlari, Xiva va Chirchiq shahridagi soliq idoralari boshliqlari ham lavozimidan bo‘shatiladi.

Ishdan olinganlar ishlagan davri uchun hamma oyligini davlatga topshirsin. Televizorda rasmini chiqarib, “xiyonatchi” deb berish kerak. Xalq bularning kimligini, siyosatga qarshi ekanini bilishi kerak.

Shavkat Mirziyoyev, O‘zbekiston Prezidenti

Avvalroq Qashqadaryo viloyati hokimi Zoir Mirzayev, viloyat prokurori Tojiyev, ichki ishlar boshlig‘i Sotvoldiyevga hamda Navoiy viloyati hokimi Qobil Tursunov va viloyat prokurori Ahmedovga hayfsan berilgan edi. Yig‘ilishda Prezident Markaziy bank, uning hududiy boshqarmalari va tijorat banklari faoliyati ham talab darajasida emasligini ta’kidlab o‘tgan.