Iqtisodchi olim, O‘zbekiston Fanlar akademiyasining akademigi Vladimir Vasilyevich Kim 8-aprelda 92 yoshida vafot etdi. Bu haqda O‘zA xabar berdi.
Olimning vafoti munosabati bilan Prezident Shavkat Mirziyoyev, bosh vazir Abdulla Aripov, Senat raisi Tanzila Norboyeva, Oliy Majlis Qonunchilik palatasi spikeri Nurdinjon Ismoilov, bosh vazir Abdulla Aripov, Fanlar akademiyasi prezidenti Behzod Yo‘ldoshev o‘z ta’ziyalarini bildirdi.
Ma’lumot uchun, Vladimir Kim 1929-yil 25-sentabrda Rossiyaning Xabarovsk o‘lkasidagi Bikin shahrida tug‘ilgan. 1950-yilda Toshkent moliya-iqtisod instituti (hozirgi Toshkent davlat iqtisodiyot universiteti)ni tamomlagan.
O‘z mehnat faoliyatini Samarqand tumanida nazorat-taftishchi sifatida boshlagan, keyinchalik Toshkent moliya-iqtisod institutining aspiranturasida o‘qigan. Dastlab nomzodlik, so‘ngra doktorlik dissertatsiyasini himoya qilgan. Ilm-fan sohasidagi ko‘p yillik samarali mehnati tufayli 2000-yilda O‘zbekiston Fanlar akademiyasining haqiqiy a’zosi etib saylangan.
Olimning qishloq xo‘jaligi iqtisodiyoti sohasining nazariy va amaliy masalalariga bag‘ishlangan 200 dan ziyod ilmiy maqolalari, 10 ga yaqin monografiyalari O‘zbekiston va chet el olimlari va mutaxassislari tomonidan ham e’tirof etilgan.
Avvalroq O‘zbekiston yoshlar tashkilotining sobiq rahbari Dilshoda Dadajonova 72 yoshida vafot etgani haqida xabar berilgan edi. Undan avval O‘zbekiston Prezidentining Farg‘onadagi qabulxonasi rahbari G‘ulomjon Boborahimov 65 yoshida, shoira Gulchehra Nurullayeva 83 yoshida, akademik To‘lqin Bekmurodov 85 yoshida vafot etgani ma’lum qilingandi.
Izoh (0)