Andijon viloyatida 2 nafar bolaning onasi kimdan ekanligi noma’lum bo‘lgan 3 oylik chaqalog‘ini sotishga urindi. Bu haqda “Qonun va ijro” nashriga tayanib, “Xalq so‘zi online” xabar berdi.
Ma’lum qilinishicha, ushbu xabar tarqalgach, farzandini sotmoqchi bo‘lgan ayol yashayotgan xonadonga chaqaloqni ko‘rgani “er-xotin mijoz” kelgan. Shu yerda bolaning onasi G‘. hamda O. ismli erkak qiz chaqaloqni 700 AQSh dollarga sotmoqchi ekanini bildirgan. Og‘zaki kelishuvdan so‘ng, ular Andijon shahridagi “Daryotrans” yonida ko‘rishadigan bo‘lgan.
Ayol va erkak 700 AQSh dollarini “mijoz”dan sanab olib, chaqaloqning tug‘ilganlik to‘g‘risidagi guvohnomasini berish vaqtida Bosh prokuratura huzuridagi departamenti xodimlari tomonidan qo‘lga olingan.
Sud hukmi bilan O. 5 yil muddatga ozodlikdan mahrum etilgan.
Onaga esa yosh chaqaloq farzandi borligi, turmush o‘rtog‘i yo‘qligi, ular onasining mehriga muhtoj ekanligi hisobga olinib, Jinoyat kodeksining 72-moddasi (shartli hukm qilish) tatbiq qilingan holda shartli jazo tayinlangan.
Avvalroq Sirdaryoda uch oylik chaqalog‘ini 3 ming dollarga sotishga uringan ayol qo‘lga olingani, Namanganda bir yoshga to‘lmagan o‘g‘lini 4700 dollarga sotishga uringan ayol ushlangani, Urganchda tug‘ilmagan bolasini 9 ming dollarga sotmoqchi bo‘lgan er-xotin qo‘lga olingani, Navoiyda bir oylik chaqalog‘ini 3 million so‘mga sotmoqchi bo‘lgan ayolga sud hukmi o‘qilgani, Kattaqo‘rg‘onda 2 yoshli o‘g‘lini 2500 dollarga sotmoqchi bo‘lgan ayol ushlangani to‘g‘risida xabar berilgandi.
Izoh (0)