Buxoro viloyati Sog‘liqni saqlash boshqarmasi ijtimoiy tarmoqlarda viloyat yuqumli kasalliklar kasalxonasining abgor ahvoldagi binosi tasvirlangan suratlarga munosabat bildirdi.
Telegram’dagi Bukhara Info kanalida Buxoro viloyat yuqumli kasalliklar kasalxonasining binosi tasvirlangan suratlar e’lon qilingan.
“Ming afsuski, bu koronavirusga chalinganlar uchun mo‘ljallangan Buxorodagi yuqumli kasalliklar shifoxonasining bo‘limi bo‘lib, u yerga keksalar ham joylashtiriladi. Biror izoh berishni ham bilmaymiz. Iltimos, buni Buxoro viloyati hokimi Botir Zaripovga ko‘rsating”, — deyiladi izohda.
Buxoro viloyati Sog‘liqni saqlash boshqarmasining ma’lum qilishicha, e’lon qilingan suratlar haqiqatda ham Buxoro viloyat yuqumli kasalliklar kasalxonasining eng eskirgan binosi hisoblanadi. Bino 1984-yilda qurilgan bo‘lib, hozirda shifoxonaning orqa tarafida qolib ketgan yagona bir qavatli davolash korpusidir.
“Chekkada bo‘lgani uchun boshqa korpuslardan izolyatsiya qilishga qulayligi hisobga olingan holda koronavirus infeksiyasi bilan kasallangan bemorlar shu yerga yotqizilmoqda. Bino eskiligiga qaramasdan ichkaridagi palatalarda COVID-19 bemorlari uchun barcha sharoitlar standart talablarga mos holda yaratib qo‘yilgan”, — deyiladi munosabatda.
Ta’kidlanishicha, ushbu binoni kapital ta’mirlash davlat Investitsiya dasturiga kiritilgan va bu ish 2021-yil may oyida amalga oshirilishi rejalashtirilgan.
Shu bilan birga, viloyat SSB so‘nggi yillarda yuqumli kasalliklar kasalxonasida qurilish va ta’mirlash ishlari olib borilayotganidan dalolat beruvchi qator suratlarni ham taqdim etgan.
Kasalxona ma’muriyati fotoaybnomadagi ko‘rinish muassasaning ta’mirtalab so‘nggi binosi ekanini bildirgan holda yaqin orada bu holat bartaraf etilishini ma’lum qilgan.
Izoh (0)