Украина президенти Донбассга борди, каска ва зирҳли нимча кийиб окопларга тушди ва вазият кескинлашганини маълум қилди (фото)

Украина президенти Владимир Зеленский Донбассга ишчи ташрифи доирасида ўт очишни тўхтатиш режимининг бузилиши энг кўп қайд этилган ҳарбийларнинг олд позицияларига ташриф буюрди, деб ёзади «РБК».

Президент матбуот хизмати томонидан эълон қилинган фотосуратларда Зеленский каска ва зирҳли нимча кийган ҳолда окопларга тушиб, ҳарбийлар билан мулоқот қилаётганини кўриш мумкин.

«Одамларнинг хотиржамлигини сақлаб, ўлкамизни ҳимоя қилаётганингиз учун раҳмат. Сизлар қаҳрамонлик ва фидокорликнинг ҳақиқий намунасисиз», — деди президент.

Учрашув иштирокчилари ҳалок бўлганлар хотирасида бир дақиқалик сукут сақлади, шундан кейин президент ҳарбийларга мукофотлар ва совғалар топширди.

Шунингдек, Украина президенти ўз ташрифи чоғида Донбассдаги вазият кескинлашганини тан олди. Унинг таъкидлашича, Украина Қуролли кучлари позициялари тан олинмаган Луганск ва Донецк халқ республикалари томонидан ўққа тутилмоқда.

«Биз сўнгги давр ичида, 1 январдан буён энг йирик эскалация, ўт очишни тўхтатиш режимининг бузилиши, қурбонлар ва яраланганлар сонининг ошиши кузатилаётган барча нуқталарни бориб кўряпмиз», — деди Зеленский.

Эслатиб ўтамиз, Украина президенти Владимир Зеленский фронтолди ҳарбийлари билан учрашиш ва «ҳимоячиларнинг руҳини кўтариш» учун мамлакат олий бош қўмондони сифатида хизмат сафари билан Донбассга жўнаб кетган эди.

Март ойи охирида The New York Times газетаси 4 минг рус қўшини Украина чегараларига, хусусан, Ростов, Брянск, Воронеж вилоятлари ва Қримга юборилгани ҳақида хабар берди. Ҳаммаси бўлиб, Россия Қуролли Кучларининг 28 та тактик баталён гуруҳи чегаралар бўйлаб жойлаштирилган. Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади.  Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди, шунингдек, АҚШ президенти Жо Байден лавозимига келганидан бери биринчи марта Украина раҳбари Владимир Зеленскийга қўнғироқ қилди. Кремлнинг таъкидлашича, Россия ўз ҳудудида ўз қўшинларини ҳаракатга келтирмоқда ва «бу ҳеч кимни безовта қилмаслиги керак, қўшин ҳеч кимга таҳдид солмайди».

Россия қўшинларининг Донбассга тортилиши фонида Украина НАТОга қўшилиш масаласини қайта кўтарди. НАТО бош котиби Йенс Столтенберг билан суҳбатда Зеленский НАТО Донбассдаги урушни тўхтатишнинг ягона йўли эканини айтди. АҚШ бу ғояни ҳозирча назарий жиҳатдан қўллаб-қувватламоқда, Кремлнинг фикрича, Украинанинг НАТОга аъзо бўлиши Донбассдаги инқирозни янада кучайтиради.