AQSh Rossiyadan Ukraina chegarasidagi “provokatsiyalar”ga izoh berishini talab qildi

AQSh rasmiylari Rossiyadan nima sababdan o‘zining janubi-g‘arbiy chegaralariga qo‘shin joylashtirgani haqida izoh talab qildi. Qo‘shma Shtatlar buni Ukrainaga qarshi provokatsiya deb hisoblamoqda. Bu haqda AQSh Davlat departamenti vakili Ned Praysga tayanib, “RBK” xabar berdi.

“Biz Rossiyadan ushbu provokatsiyalarga izoh berishni so‘radik. Lekin eng muhimi, ... ukrainalik hamkorlarimizga, shuningdek, Rossiyaga ham, ushbu po‘pisa va tajovuzga qarshi Ukrainani qo‘llab-quvvatlashimizni to‘g‘ridan to‘g‘ri tushuntirib qo‘ydik”, — dedi Ned Prays.

“AQSh Rossiyaning Ukrainaga qarshi tobora kuchayib borayotgan tajovuzkorligidan, xususan, chegaralarda harbiy kuchlarning ko‘payishidan xavotirda va buni vaziyatning keskinlashuvi deb biladi”, —deya ta’kidladi departament vakili.

Mart oyi oxirida The New York Times gazetasi 4 ming rus qo‘shini Ukraina chegaralariga, xususan, Rostov, Bryansk, Voronej viloyatlari va Qrimga yuborilgani haqida xabar berdi. Hammasi bo‘lib, Rossiya Qurolli Kuchlarining 28 ta taktik batalyon guruhlari chegaralar bo‘ylab joylashtirilgan.

Rossiya prezidentining vakili Dmitriy Peskov ushbu xabarga javoban Rossiya qo‘shinlarining mamlakat hududi bo‘ylab harakatlanishi boshqa davlatlarga tahdid solmasligi va ularni bezovta qilmasligini aytdi. Mudofaa vazirligi harbiylarning Qrim yarim oroliga borishini Janubiy harbiy okrugning rejalashtirilgan mashg‘ulotlari deya izohladi.

Conflict Intelligence Team (CIT) surishtiruv guruhi ham harbiy qismlarning Rostov viloyatiga yuborilishi to‘g‘risida xabar bergan, guruh ma’lumotlariga ko‘ra, ba’zi transport vositalarining raqamlari berk bo‘lgan. Bunga javoban Peskov Rossiya armiyasi “Rossiya hududida zarur deb hisoblagan yo‘nalishlarda harakatlanishini” aytdi. Kreml agar NATO qo‘shinlari Ukraina hududida paydo bo‘lsa yoki qo‘shni davlatlarda harbiy bloklar kuchaytirilsa, Rossiya o‘z xavfsizligini ta’minlash uchun qo‘shimcha choralar ko‘rishini bildirib o‘tdi.

Avvalroq Yevropa Ittifoqi Rossiya prezidenti Vladimir Putinning Qrim va Sevastopolning aksariyat hududlarida chet el fuqarolari uchun yerga egalik qilishni taqiqlovchi farmonini tanqid qilgan edi.  Ta’kidlanishicha, Qrimda yerga egalik qilishning taqiqlanishi xalqaro gumanitar huquqni buzadi, chunki bu hudud aholisini Rossiya fuqaroligini qabul qilishga majburlaydi.

Shuningdek, Kanada va Avstraliya Qrim sababli Rossiyaga qarshi yangi sanksiyalar e’lon qilgan edi.