Toshkentda 7-aprel kuni isitish mavsumi yakunlanadi. Bu haqda poytaxt hokimligi matbuot xizmati xabar berdi. Hokimning tegishli qarori 5-aprel kuni qabul qilingan.
Unga ko‘ra, markazlashgan issiqlik ta’minoti 7-aprel kuni soat 10:00 da yakunlanadi va 2021—2022-yilgi kuz-qish mavsumiga tayyorgarlik ko‘rish ishlari belgilangan tartibda boshlanadi.
“O‘zgidromet” ma’lumotlariga ko‘ra, O‘zbekistonga Eron hududidan iliq va quruq havo massalari kirib kelib, yaqin kunlarda havo harorati 32 darajagacha ko‘tarilishi kutilmoqda.
Eslatib o‘tamiz, poytaxtda isitish mavsumi 2020-yil 15-oktabr kunidan boshlangandi. 2020—2021-yillar isitish mavsumidan boshlab markazlashtirilgan issiqlik ta’minoti xizmatlari uchun iste’molchilar bilan hisob-kitoblar isitish davrining har bir kuniga 1 kvadrat metr isitiladigan maydon hisobida to‘lash tizimiga o‘tkazildi.
Toshkent shahri issiqlik ta’minoti tizimini zamonaviy energotejamkor texnologiyalar asosida rivojlantirish maqsadida 2019-yil 2-dekabrda Prezidentning tegishli qarori imzolangan. Qaror bilan 2020–2022-yillarda Toshkent shahri issiqlik ta’minoti tizimi samaradorligining asosiy maqsadli indikatorlari tasdiqlanib, 2023-yilgacha 358,5 kilometr quvurlarning almashtirilishi (qayta yotqizish) ko‘zda tutilgan. Bundan 2021-yilda — 157,3 kilometr quvurlar, 2022-yilda — 201,2 kilometr quvurlar almashtiriladi.
Izoh (0)