Ichki ishlar organlar xodimlari va ularning oila a’zolarini shaxsiy ma’lumotlarini tarqatganlik uchun javobgarlik belgilanadi

Shavkat Mirziyoyev “Jamoat xavfsizligini ta’minlash va jinoyatchilikka qarshi kurashish sohasida ichki ishlar organlari faoliyatini sifat jihatidan yangi bosqichga ko‘tarish chora-tadbirlari to‘g‘risida”gi farmonni imzoladi.

Farmon bilan ichki ishlar organlari faoliyatini tashkil etishning mutlaqo yangi mexanizmlari belgilangan:

• har bir mahalla, oila va shaxs kesimida jinoyatchilikning sabablarini aniqlash va ularni bartaraf etish orqali huquqbuzarliklarning oldini olish va jinoyatchilikka qarshi kurashishga oid muammolarni bevosita joylarning o‘zida hal etish;
• hududlarda jinoyatchilik ahvolidan kelib chiqib, har bir tuman, shahar va mahallalarni toifalarga ajratish hamda hokimliklar, sektorlar va jamoatchilik bilan hamkorlikda “jinoyat o‘choqlari”ni bartaraf etish uchun barcha zarur kuch va vositalarni jalb qilish;
• “respublika — viloyat — tuman — mahalla” tizimi asosida yaxlit boshqaruv va uzluksiz nazorat qilish mexanizmlarini joriy etish, ichki ishlar va boshqa davlat organlarining jamoat xavfsizligini ta’minlash borasidagi faoliyatini samarali muvofiqlashtirish orqali mamlakatimizda tinchlik va barqarorlikni ta’minlash;
• ichki ishlar organlari xodimlarining zamonaviy qiyofasini yaratish, ularning mas’uliyati va kasbiy salohiyatini oshirish, jinoyatchilikning yangi ko‘rinishlariga qarshi kurashish uchun zarur ko‘nikmalarni shakllantirish hamda sohani to‘liq raqamlashtirishga erishish.

Hujjatga ko‘ra, huquq-tartibot organlari xodimlarining huquqiy himoyasini kuchaytirishga doir quyidagi takliflar kiritiladi:

• xizmat vazifasini bajarayotgan huquq-tartibot organlari xodimlarining sha’ni va qadr-qimmatini kamsitish, sog‘lig‘iga shikast yetkazish, shuningdek, qonuniy talablariga bo‘ysunmaslik va faol qarshilik ko‘rsatganlik uchun ma’muriy va jinoiy javobgarlik choralarini kuchaytirish;
• huquq-tartibot organlari xodimlari va oila a’zolarining shaxsiy hayoti to‘g‘risidagi ma’lumotlarni tarqatganlik uchun javobgarlik belgilash;
• ichki ishlar organlari xodimlari va ularning oila a’zolarini davlat tomonidan ijtimoiy-huquqiy himoya qilishning yagona huquqiy asosini, ushbu yo‘nalishdagi kafolatlar va aniq mexanizmlarni nazarda tutgan holda yaratish.

Avvalroq Ichki ishlar vazirligi tizimida har yili “Eng yaxshi profilaktika inspektori” respublika tanlovi o‘tkazilishi to‘g‘risida xabar berilgandi.