2021-yil bahorining eng yirik voqealaridan biri bo‘lishi kutilayotgan “Toshkent Besh tashabbus harakati” doirasidagi tadbirlarda ishtirok etish uchun hozirgacha 3 mingdan ziyod yigit-qizlar ro‘yxatdan o‘tdi. Bu haqda tadbir tashkilotchilari “Daryo”ga ma’lum qildi. Shuningdek, yana 3 ming kishi mehmon sifatida ro‘yxatdan o‘tgan.
Ularning 1,8 mingdan ortig‘i sport tadbirlarida ishtirok etish istagini bildirgan. Jumladan, Laser Run zamonaviy beshkurash qoidalari asosidagi musobaqalarda qatnashish uchun 120 kishi ro‘yxatdan o‘tgan.
Bloger va musiqachi Nikita Makarenko rahbarligida o‘tkaziladigan Tashkent Voice Fest vokal ijrochilar tanlovida qatnashish uchun hozirga qadar 100 dan ortiq, Street Art graffiti rassomlar tanlovida ishtirok etish uchun 38 ta ariza kelib tushgan, xoreograf Sergey Zlotnikov rahbarlik qiladigan Tashkent Dance Fest raqs festivalida hozircha 80 kishi o‘z mahoratini ko‘rsatish istagini bildirgan.
Avval xabar berilganidek, Toshkent shahar hokimligi tomonidan tashkil etilayotgan “Toshkent Besh tashabbus harakati” doirasida taniqli bloger Xushnudbek Xudoyberdiyev rahbarligida “Zakovat” intellektual turniri ham bo‘lib o‘tadi. Hozirgacha ushbu bilimlar musobaqasida ishtirok etish uchun 200 dan ortiq jamoa ariza berdi.
“Toshkent Besh tashabbus harakati” tadbirlarini o‘tkazish uchun poytaxt markazida 37,5 ming kvadrat metr maydonda “shahar ichidagi maxsus shahar” bunyod etilmoqda. Uning dekoratsiyalari yengil konstruksiyalardan shakllantirilmoqda. Mazkur yoshlar festivalida nafaqat ishtirokchi, balki oddiy mehmon sifatida ham qatnashish mumkni. Buning uchun harakatning rasmiy sayti — www.toshkent21.uz saytida ro‘yxatdan o‘tish kerak.
Izoh (0)