Тошкентда 7 апрель куни иситиш мавсуми якунланади. Бу ҳақда пойтахт ҳокимлиги матбуот хизмати хабар берди. Ҳокимнинг тегишли қарори 5 апрель куни қабул қилинган.
Унга кўра, марказлашган иссиқлик таъминоти 7 апрель куни соат 10:00 да якунланади ва 2021—2022 йилги куз-қиш мавсумига тайёргарлик кўриш ишлари белгиланган тартибда бошланади.
«Ўзгидромет» маълумотларига кўра, Ўзбекистонга Эрон ҳудудидан илиқ ва қуруқ ҳаво массалари кириб келиб, яқин кунларда ҳаво ҳарорати 32 даражагача кўтарилиши кутилмоқда.
Эслатиб ўтамиз, пойтахтда иситиш мавсуми 2020 йил 15 октябрь кунидан бошланганди. 2020—2021 йиллар иситиш мавсумидан бошлаб марказлаштирилган иссиқлик таъминоти хизматлари учун истеъмолчилар билан ҳисоб-китоблар иситиш даврининг ҳар бир кунига 1 квадрат метр иситиладиган майдон ҳисобида тўлаш тизимига ўтказилди.
Тошкент шаҳри иссиқлик таъминоти тизимини замонавий энерготежамкор технологиялар асосида ривожлантириш мақсадида 2019 йил 2 декабрда Президентнинг тегишли қарори имзоланган. Қарор билан 2020–2022 йилларда Тошкент шаҳри иссиқлик таъминоти тизими самарадорлигининг асосий мақсадли индикаторлари тасдиқланиб, 2023 йилгача 358,5 километр қувурларнинг алмаштирилиши (қайта ётқизиш) кўзда тутилган. Бундан 2021 йилда — 157,3 километр қувурлар, 2022 йилда — 201,2 километр қувурлар алмаштирилади.
Изоҳ (0)