4-aprel kuni Eron tashqi ishlar vaziri Muhammad Javod Zarif boshchiligidagi delegatsiya O‘zbekistonga keldi, deb xabar beradi “Dunyo” agentligi.
Ma’lum qilinishicha, 5-aprel kuni bo‘lib o‘tadigan O‘zbekiston—Eron muzokaralarida siyosiy, savdo-iqtisodiy, investitsiyaviy, transport-logistika va boshqa sohalardagi o‘zaro munosabatlarning hozirgi holati va istiqbollarini muhokama qilish rejalashtirilgan. Tomonlarni qiziqtirgan mintaqaviy va xalqaro ahamiyatga molik masalalar yuzasidan ham fikr almashadi.
Tashrif dasturiga binoan Eron Tashqi ishlar vazirligi rahbarining “Hazrati Imom” majmuasi va Islom sivilizatsiyasi markaziga tashrif buyurishi, Toshkentning diqqatga sazovor joylari bilan tanishishi kutilmoqda.
Eslatib o‘tamiz, 2017-yilning oktabrida Abdulaziz Komilov va Javod Zarif O‘zbekiston va Eron TIVlari o‘rtasidagi Hamkorlik dasturini imzolagan edi. 2018-yilning fevralida Tehronga amalga oshirilgan tashrif davomida O‘zbekiston tashqi ishlar vaziri Eron TIV rahbari bilan BMT, ShHT va boshqa xalqaro tashkilotlar doirasida hamkorlik qilish masalalarini muhokama qilgandi.
Izoh (0)