Rossiya sanoat va savdo vaziri Denis Manturov boshchiligidagi delegatsiyasi bo‘lgan samolyot 4-aprel kuni Islom Karimov nomidagi Toshkent xalqaro aeroportiga kelib qo‘ndi. Bu haqda Telegram’dagi “Novosti Tashkentskogo neba” kanali xabar berdi.
Denis Manturov 5—7-aprel kunlari Toshkentdagi “O‘zekspomarkaz” milliy ko‘rgazmalar markazida bo‘lib o‘tadigan xalqaro sanoat ko‘rgazmasida ishtirok etishi kutilmoqda. Tadbir Rossiya Sanoat va savdo vazirligi hamda O‘zbekiston Investitsiyalar va tashqi savdo vazirligi tomonidan tashkil etilmoqda.
Investitsiyalar va tashqi savdo vazirligi matbuot xizmatining ma’lum qilishicha, ushbu ko‘rgazmada va biznes-dasturda Armaniston, Belarus, Germaniya, Qozog‘iston, Qirg‘iziston, Rossiya, O‘zbekiston, Fransiya, Chexiya va Yaponiyaning 300 dan ortiq sanoat kompaniyalari va ishbilarmonlar delegatsiyalari ishtirok etadi.
Tadbirdan ko‘zlangan asosiy maqsad – ishtirokchi mamlakatlar va kompaniyalar o‘rtasida sanoat kooperatsiyasini kengaytirish, sanoatni rivojlantirish va qo‘shma korxonalar tashkil etishning yangi imkoniyatlarini aniqlashdan iborat. Ko‘rgazmaning asosiy bo‘limlari: transport va energetika mashinasozligi, sanoat AT, shaharlar uchun texnologiyalar, tibbiy asbob-uskunalar va farmatsevtika, metallurgiya va materiallar, plastmassa va kauchuklar.
Biznes dasturining birinchi kunida Rossiya sanoat va savdo vaziri Denish Manturov va O‘zbekiston bosh vazirining o‘rinbosari – investitsiyalar va tashqi savdo vaziri Sardor Umrzoqov ishtirokida “Jahon sanoat ishlab chiqarish sohasi o‘sish drayverlarini aniqlamoqda” asosiy Strategik sessiyasi bo‘lib o‘tadi.
Ma’lumot uchun, Rossiyaning “Innoprom” sanoat ko‘rgazmasi 2010-yildan boshlab Yekaterinburgda har yili o‘tkazib kelinmoqda. Ko‘rgazma maydoni 50 ming kvadrat metr bo‘lib, u “Yekaterinburg EKSPO” xalqaro ko‘rgazmalar majmuasining 4 pavilyonini egallaydi. Har yili ko‘rgazmada 600 tadan ortiq eksponentlar namoyish etiladi hamda dunyoning eng yirik kompaniyalar: Siemens, FANUC, Mazak, Rittal, KUKA, Yaskawa, Volvo, SAP, Dassault Systemes, shuningdek, yetakchi Rossiya ishlab chiqaruvchilari – “Rostex” davlat korporatsiyasi, “Sinara” guruhi, ChQPZ, “Rosatom” davlat korporatsiyasi, UTMK, “Sollers”, “KamAZ” va boshqalar ishtirok etadi. Ko‘rgazmaga har yili 70 mamlakatdan o‘rtacha 50 mingga yaqin mehmon tashrif buyuradi.
Mavzuga doir: O‘zbekiston va Rossiya hamkorlikda investitsiya fondi tuzish masalasini ko‘rib chiqadi
Izoh (0)