O‘zbekiston Prezidenti Shavkat Mirziyoyev “Davlat hokimiyati va boshqaruvi organlarining tuzilmasini maqbullashtirish va shtat birliklari sonini qisqartirish to‘g‘risida”gi qarorni imzoladi, deb xabar beradi “Gazeta.uz”.
Qarorga ko‘ra, Moliya vazirligiga 2021-yil 15-mayga qadar mehnatga haq to‘lashning yagoni tizimini joriy etish bo‘yicha Prezident qarori loyihasini tayyorlash topshirilgan. Hujjat davlat hokimiyati va boshqaruvi organlari, ularning idoraviy va hududiy bo‘linmalari faoliyati samaradorligini oshirishni, yuqori samarali ishlashga intilishni kuchaytirishi hamda xodimlarning o‘z kasbiy salohiyatini oshirishga qiziqishini ta’minlashni nazarda tutishi kerak.
Bundan tashqari, Prezident huzuridagi Davlat xizmatini rivojlantirish agentligi, Iqtisodiy taraqqiyot va kambag‘allikni qisqartirish vazirligi, Adliya vazirligi boshqa manfaatdor vazirlik va idoralar bilan birgalikda uch oy muddatda Prezident qarori loyihasini taqdim etishlari shart:
- mahalliy boshqaruv organlari va davlat organlarida AKTdan faol foydalanish orqali samaradorlikning eng muhim ko‘rsatkichlariga (KPI) asoslangan zamonaviy baholash usullarini joriy etish;
- administrativ islohotlar doirasida funksiya va vazifalarni takrorlovchi davlat organlari sonini ularning faoliyati samaradorligi va natijakorligini chuqur tahlil qilish orqali qisqartirish;
- Qoraqalpog‘iston Respublikasi Vazirlar Kengashi, viloyatlar, Toshkent shahri, tumanlar va shaharlar hokimliklari tarkibi va boshqaruv kadrlari sonini qayta ko‘rib chiqish.
Hozirda davlat xizmatchilarining mehnati yagona tarif setkasi asosida baholanmoqda.
Prezidentning 2019-yil 3-oktabrdagi farmoni bilan davlat organi va tashkiloti darajasidan (respublika, viloyat, tuman va shahar), xodimning malaka martabasi (darajasi) va shaxsiy hissasidan kelib chiqqan holda ish haqini belgilashga nisbatan unifikatsiyalashtirilgan talablar o‘rnatilishini nazarda tutuvchi davlat fuqarolik xizmatchilari mehnatiga haq to‘lashning yagona tizimi joriy etilgan.
2020-yilning mayida davlat xizmatlari to‘g‘risidagi qonun loyihasi muhokamaga qo‘yilgan, biroq qabul qilinmagan edi.
Avvalroq O‘zbekistonda Davlat organlari xodimlarining soni 15 foizgacha qisqartirilishi to‘g‘risida xabar berilgandi.
Izoh (0)