Qashqadaryo hokimi Zoir Mirzayev viloyatning Kasbi tumanidagi markaziy shifoxona faoliyatidan qoniqmasligini aytib, bemorlarga pishiriladigan ovqatni berishda, ularni dori bilan ta’minlashda “o‘yin” bo‘layotganini bildirdi. Bu haqda viloyat hokimi boshchiligidagi mas’ullarning Kasbi xalqi oldidagi hisobotida ma’lum qilindi, deya xabar berdi “Daryo” muxbiri.
Ta’kidlanishicha, viloyat rahbari hamda hududdagi barcha tashkilot va korxona mas’ullari 2-aprel, juma kuni Kasbi tumanining Fazli qishlog‘ida bo‘lib, xalq vakillari oldida 2021-yilda tumanda amalga oshiriladigan ishlar yuzasidan hisobot bergan.
Tadbirda so‘z olgan viloyat hokimi Zoir Mirzayev tuman tibbiyot birlashmasi faoliyatidan qoniqmayotganini aytib, “shifoxona holiga maymunlar yig‘laydi”, degan.
“Qashqadaryo viloyatidagi birorta kasalxona, jumladan, Kasbi tuman kasalxonasi nega autsorsing tizimiga o‘tmaydi? Bosh shifokor bormi? To‘g‘ri, bosh shifokorning yoshi ulug‘ligini inobatga olib, hurmat qilamiz. Ammo shifoxona holiga maymunlar yig‘laydi. Shu sabab tibbiyot xizmatidan butun xalq norozi. Qani birorta deputat kim bilandir gaplashdimi? Dorida ‘o‘yin’, ovqatda ‘o‘yin’. Hammasida ‘o‘yin’. Nega Kasbida bunday bo‘lishi kerak”, — dedi viloyat hokimi Zoir Mirzayev.
Hokim, shuningdek, tumandagi qishloq vrachlik punktlarining aholiga zarur paytda qulflab ketilishini, bunga bosh shifokorlar e’tibor ham qaratmayotganini tanqid qildi.
“Bundan besh-olti oy ilgari Kasbi tumaniga kelganimizda 24 soat o‘tirib, tez yordamning ko‘ngildagidek ishlashini yo‘lga qo‘yib, ularning xonalarini tiklab berganmiz. Xo‘sh, keyin-chi? Nima bo‘ldi? Qishloq vrachlik punktlari kechki payt qulflab ketilsa, odamlar kechasi qayoqqa boradi? Hamma joyda kasalning asosiy qismi kechki payt 7 dan, ertalab 7 gacha bezovta bo‘ladi-ku. Lekin shu paytda qishloq vrachlik punkti yopiq. Bosh shifokorga esa buning farqi yo‘q. Men yana aytaman, oldingi safar o‘ziga ham aytgandim, bosh shifokor faoliyatidan mutlaqo noroziman”, — dedi Zoir Mirzayev.
Viloyat rahbari hududdagi mavjud tuman tibbiyot birlashmalari bemorlarni ovqat bilan ta’minlashda autsorsing tizimiga o‘tmayotganini alohida ta’kidlab, bu borada prokurorlarga topshiriq berganini bildirdi.
“Tuman tibbiyot birlashmalarida dori va oziq-ovqatni qanday yo‘l bilan olyapmiz, qayerdan olyapmiz? Buni o‘rganish uchun prokurorlarga topshiriq berdim. Nega bog‘chalar, harbiylar autsorsingga o‘tyapti, nega shifoxona o‘tmayapti? Bizda go‘sht olib kelish kerak, ‘balnitsa’ga bir kunda 40 kilogramm go‘sht. Uniyam 10 kilosini kimdir yeb ketdi. ‘Balnitsa’da 400 nafar kasal yotibdi, nimagadir qozonda 200 nafar kasalga ovqat pishadi. Shu ovqatni ham hech kim yemaydi. Shuni yemasligini hammamiz bilamiz. Chunki, bemorning uyidan ovqat keladi”, — dedi viloyat rahbari.
Zoir Mirzayev hududdagi shifoxonalarda tibbiy xizmat bepul ekani faqatgina qog‘ozlarda qolib ketayotganini, ammo amalda manfaatdorlik yuqori darajadaligini qo‘shimcha qildi.
Izoh (0)