Venesuela prezidenti Nikolas Maduro koronavirusga qarshi vaksina uchun neft bilan haq to‘lashni taklif qildi. Bu haqda u Twitter orqali ma’lum qildi, deb yozmoqda “RBK”.
Maduroning so‘zlariga ko‘ra, Venesuelada COVAX mexanizmi orqali vaksina olishning ikkita yo‘li mavjud — mamlakatdan “o‘g‘irlangan” pul yordamida yoki preparatni neftga almashtirish orqali.
Ayni paytda Venesuela AQSh sanksiyalari ostida turibdi. Venesuela portlaridan neft eksport qiladigan barcha tankerlar va ularga egalik qiluvchi kompaniyalar cheklovlarga duch kelishi mumkin. Ularga Amerika kompaniyalari bilan hamkorlik qilish va AQShda hisob raqamga egalik qilish taqiqlanadi.
Avvalroq vitse-prezident Delsi Rodriges mamlakatning xorijiy banklardagi hisob raqamlarida qariyb 7 milliard dollar borligini, ularning bir qismiga vaksina sotib olish rejalashtirilganini aytgandi. Shuningdek, Rodriges AstraZeneca vaksinasining nojo‘ya asoratlari haqidagi xabarlar tufayli Venesuela preparatni tasdiqlamasligini qo‘shimcha qilgan.
Ma’lumot uchun, COVAX dasturida 170 mamlakat ishtirok etadi. Dastur doirasida o‘rta va yuqori daromadli mamlakatlar vaksina sotib olishga qurbi yetmaydigan 92 ta davlat uchun zarur dori vositalar pulini to‘lab beradi. Vaksinani qabul qiluvchi mamlakatlardan faqat qisman to‘lov (15 foiz) talab qilinadi. Ushbu dastur orqali yetkazib beriladigan vaksinalarning katta qismini AstraZeneca tashkil qiladi. Shuningdek, mamlakatlar Pfizer va BioNTech vaksinalari bilan ham ta’minlanadi. Mart oyida Rossiya to‘g‘ridan to‘g‘ri investitsiya fondi Rossiyaning “Sputnik V” vaksinasini xalqaro COVAX dasturiga kiritish uchun ariza topshirdi.
Eslatib o‘tamiz, Venesuela fevral oyida Rossiyaning “Sputnik V” vaksinasi birinchi partiyasini qabul qilib olgan va aholini vaksinatsiya qilishni boshlagan. 6-mart kuni Maduroning Rossiya vaksinasi bilan emlangani haqida xabar berilgan.
Avvalroq Venesuela prezidenti Nikolas Maduroning Facebook ijtimoiy tarmog‘idagi sahifasi bloklab qo‘yilgan edi. Mamlakat rahbari koronavirus haqida yolg‘on axborotlarni tarqatmaslik to‘g‘risidagi qoidalarni buzgani uchun jazolangan.
Izoh (0)