Венесуэла президенти Николас Мадуро коронавирусга қарши вакцина учун нефть билан ҳақ тўлашни таклиф қилди. Бу ҳақда у Twitter орқали маълум қилди, деб ёзмоқда «РБК».
Мадуронинг сўзларига кўра, Венесуэлада COVAX механизми орқали вакцина олишнинг иккита йўли мавжуд — мамлакатдан «ўғирланган» пул ёрдамида ёки препаратни нефтга алмаштириш орқали.
Айни пайтда Венесуэла АҚШ санкциялари остида турибди. Венесуэла портларидан нефть экспорт қиладиган барча танкерлар ва уларга эгалик қилувчи компаниялар чекловларга дуч келиши мумкин. Уларга Америка компаниялари билан ҳамкорлик қилиш ва АҚШда ҳисоб рақамга эгалик қилиш тақиқланади.
Аввалроқ вице-президент Дельси Родригес мамлакатнинг хорижий банклардаги ҳисоб рақамларида қарийб 7 миллиард доллар борлигини, уларнинг бир қисмига вакцина сотиб олиш режалаштирилганини айтганди. Шунингдек, Родригес AstraZeneca вакцинасининг ножўя асоратлари ҳақидаги хабарлар туфайли Венесуэла препаратни тасдиқламаслигини қўшимча қилган.
Маълумот учун, COVAX дастурида 170 мамлакат иштирок этади. Дастур доирасида ўрта ва юқори даромадли мамлакатлар вакцина сотиб олишга қурби етмайдиган 92 та давлат учун зарур дори воситалар пулини тўлаб беради. Вакцинани қабул қилувчи мамлакатлардан фақат қисман тўлов (15 фоиз) талаб қилинади. Ушбу дастур орқали етказиб бериладиган вакциналарнинг катта қисмини AstraZeneca ташкил қилади. Шунингдек, мамлакатлар Pfizer ва BioNTech вакциналари билан ҳам таъминланади. Март ойида Россия тўғридан-тўғри инвестиция фонди Россиянинг «Спутник V» вакцинасини халқаро COVAX дастурига киритиш учун ариза топширди.
Эслатиб ўтамиз, Венесуэла февраль ойида Россиянинг «Спутник V» вакцинаси биринчи партиясини қабул қилиб олган ва аҳолини вакцинация қилишни бошлаган. 6 март куни Мадуронинг Россия вакцинаси билан эмлангани ҳақида хабар берилган.
Аввалроқ Венесуэла президенти Николас Мадуронинг Facebook ижтимоий тармоғидаги саҳифаси блоклаб қўйилган эди. Мамлакат раҳбари коронавирус ҳақида ёлғон ахборотларни тарқатмаслик тўғрисидаги қоидаларни бузгани учун жазоланган.
Изоҳ (0)