Rossiya Ichki ishlar vazirligi chet el fuqarolarini ro‘yxatdan o‘tkazish uchun muhojirlarga davlat xizmatlarini elektron shaklda olish imkonini beradigan yagona axborot platformasi yaratilishini ma’lum qildi. Bu haqda Meduza xabar berdi.
Yaratilayotgan tizimda muhojirlarning raqamli profillari ochiladi. Profillar chet el fuqarosining huquqiy holati, uning biometrik ma’lumotlari, yashash va ish joyi to‘g‘risidagi ma’lumotlarni o‘z ichiga oladi.
Raqamli profil yordamida chet elliklar mehnat shartnomasi tuzish, talabaligini tasdiqlash, soliq va boshqa majburiy to‘lovlarni to‘lash, axborot xizmatlaridan foydalanish, shuningdek, mamlakatdan chiqib ketish zarurligi to‘g‘risidagi axborot byulletenlarini o‘z vaqtida olish imkoniyatiga ega bo‘ladi.
Mart oyi boshida Rossiya Ichki ishlar vazirligi muhojirlar va ularning potensial ish beruvchilariga maxsus elektron jurnalda ro‘yxatdan o‘tish majburiyatini yuklovchi qonun loyihasi ishlab chiqilayotgani haqida xabar bergan edi. 2020-yil noyabr oyida esa vazirlik rossiyalik va chet elliklar uchun yuz tasviri va barmoq izlari bilan shaxsni aniqlashga imkon beradigan biometrik ma’lumotlarning markazlashtirilgan bankini yaratish haqida ma’lum qilgan.
Rossiya Ichki ishlar vazirligi ma’lumotlariga ko‘ra, 2020-yilda Rossiyadagi muhojirlar soni 6,3 million kishiga — deyarli ikki baravarga kamaydi, ilgari mamlakatda o‘rtacha 9—11 million muhojir bo‘lgan. Taxminan, bir million muhojir mamlakatda yashash uchun guvohnoma yoki vaqtinchalik yashash uchun ruxsatnomaga ega.
Avvalroq Rossiya Qurilish vazirligi va kommunal xizmatlar boshqarmasi migrantlarning qurilish ishlariga kelishlari uchun mamlakatga kirish shartlarini soddalashtirishni so‘ragan va bir qator takliflar bergan edi. Vazirlik qurilish maydonlarida ishchi kuchi yetishmasligining asosiy sababi sifatida chet ellik ishchilarning Rossiyaga kirishiga taqiq qo‘yilganini keltiradi. Shuningdek, bahorda to‘xtatilgan qurilish maydonlarida mehnat muhojirlarining ishlab chiqarish sohasiga o‘tishi ta’sir ko‘rsatgan.
Shuningdek, Rossiya Savdo-sanoat palatasi mehnat migrantlarining oilasi bilan mamlakatga kelishiga ruxsat berilishini so‘rab chiqqan.
Izoh (0)