Россия Ички ишлар вазирлиги чет эл фуқароларини рўйхатдан ўтказиш учун муҳожирларга давлат хизматларини электрон шаклда олиш имконини берадиган ягона ахборот платформаси яратилишини маълум қилди. Бу ҳақда Meduza хабар берди.
Яратилаётган тизимда муҳожирларнинг рақамли профиллари очилади. Профиллар чет эл фуқаросининг ҳуқуқий ҳолати, унинг биометрик маълумотлари, яшаш ва иш жойи тўғрисидаги маълумотларни ўз ичига олади.
Рақамли профиль ёрдамида чет элликлар меҳнат шартномаси тузиш, талабалигини тасдиқлаш, солиқ ва бошқа мажбурий тўловларни тўлаш, ахборот хизматларидан фойдаланиш, шунингдек, мамлакатдан чиқиб кетиш зарурлиги тўғрисидаги ахборот бюллетенларини ўз вақтида олиш имкониятига эга бўлади.
Март ойи бошида Россия Ички ишлар вазирлиги муҳожирлар ва уларнинг потенциал иш берувчиларига махсус электрон журналда рўйхатдан ўтиш мажбуриятини юкловчи қонун лойиҳаси ишлаб чиқилаётгани ҳақида хабар берган эди. 2020 йил ноябрь ойида эса вазирлик россиялик ва чет элликлар учун юз тасвири ва бармоқ излари билан шахсни аниқлашга имкон берадиган биометрик маълумотларнинг марказлаштирилган банкини яратиш ҳақида маълум қилган.
Россия Ички ишлар вазирлиги маълумотларига кўра, 2020 йилда Россиядаги муҳожирлар сони 6,3 миллион кишига — деярли икки бараварга камайди, илгари мамлакатда ўртача 9—11 миллион муҳожир бўлган. Тахминан, бир миллион муҳожир мамлакатда яшаш учун гувоҳнома ёки вақтинчалик яшаш учун рухсатномага эга.
Аввалроқ Россия Қурилиш вазирлиги ва коммунал хизматлар бошқармаси мигрантларнинг қурилиш ишларига келишлари учун мамлакатга кириш шартларини соддалаштиришни сўраган ва бир қатор таклифлар берган эди. Вазирлик қурилиш майдонларида ишчи кучи етишмаслигининг асосий сабаби сифатида чет эллик ишчиларнинг Россияга киришига тақиқ қўйилганини келтиради. Шунингдек, баҳорда тўхтатилган қурилиш майдонларида меҳнат муҳожирларининг ишлаб чиқариш соҳасига ўтиши таъсир кўрсатган.
Шунингдек, Россия Савдо-саноат палатаси меҳнат мигрантларининг оиласи билан мамлакатга келишига рухсат берилишини сўраб чиққан.
Изоҳ (0)