Buxorodagi binoning bir qismi qulashiga sababchi bo‘lgan tadbirkorga nisbatan to‘plangan hujjatlar sudga taqdim etildi. Bu haqda Buxoro shahar qurilish sohasida hududiy nazorat inspeksiyasi mutaxassislari bergan ma’lumotga tayanib “Daryo” muxbiri xabar berdi.
Buxoro viloyat hokimligi tomonidan “Daryo”ga taqdim etilgan ma’lumotga ko‘ra, tadbirkor Bahrom Raupov shaharsozlik hujjatlarini to‘liq rasmiylashtirmagan. Qurilish sohasida hududiy nazorat inspeksiyasiga tegishli tartibda xabarnoma yubormasdan, shaharsozlik normalariga zid ravishda kotlovan qazish ishlarini olib borgan.
“Fuqaro Bahrom Raupov obyektdagi qurilish ishlarini o‘zboshimchalik bilan boshlagani oydinlashdi. Shu munosabat bilan unga nisbatan Ma’muriy javobgarlik to‘g‘risidagi kodeksning 99-moddasi 7-bandi (obyektlarni davlat ekspertizasining loyiha-smeta hujjatlariga, shu jumladan, ish hujjatlariga doir ijobiy xulosasisiz, shuningdek, qurilish sohasida nazorat qilish va yo‘l-qurilish ishlari sifatini nazorat qilish inspeksiyalarining ruxsatnomasisiz qurish) bilan ma’muriy jarima qo‘llash uchun to‘plangan hujjatlar to‘plami sudga taqdim etilganini ma’lum qilamiz”, — deydi viloyat hokimligi vakili.
Qayd etish lozim, mazkur modda bilan ayblangan huquqbuzarning aybi sudda isbotlansa, fuqarolar bazaviy hisoblash miqdorining yigirma besh baravaridan o‘ttiz baravarigacha, mansabdor shaxslar esa ellik baravaridan (12 million 250 ming so‘m) yetmish baravarigacha (17 million 150 ming so‘m) miqdorda jarimaga tortiladi.
Izoh (0)