Navoiy viloyati prokurori Baxtiyor Ahmedov viloyat DXX boshqarmasi bilan hamkorlikda viloyat hududida qurilish sohasida davlat xaridlarini amalga oshirish jarayonida korrupsion holatlarga yo‘l qo‘ymaslik borasida sohaga mas’ul tashkilotlar ishtirokida yig‘ilish o‘tkazdi, deya xabar bermoqda Bosh prokuratura.
Yig‘ilishda Navoiy viloyat hokimining soha bo‘yicha o‘rinbosari, 5 ta buyurtmachi tashkilot rahbarlari va tender komissiyasi a’zolari qatnashib, ular 2021-yilda amalga oshiriladigan qurilish-ta’mirlash uchun pudratchilarni tanlashda amaldagi tartib-qoidalarga og‘ishmay rioya etish, tanish-bilishchilik va boshqa korrupsion holatlarga yo‘l qo‘ymaslik xususida rasman ogohlantirilgan.
Shuningdek, yig‘ilishda loyiha va pudrat ishlari (xizmatlari) xaridi jarayonlarining shaffofligini ta’minlash, ushbu sohada “Shaffof qurilish” milliy axborot tizimidan, shu jumladan, elektron tender platformasidan tizimli foydalanish hamda tanlov (tender) g‘oliblari bilan o‘rnatilgan tartibda pudrat shartnomalarini tuzish choralarini ko‘rish bo‘yicha zarur ko‘rsatmalar berilgan.
Bundan tashqari, mas’ullarga qurilish sohasida yo‘l qo‘yilayotgan korrupsion holatlar, budjet mablag‘larining maqsadsiz sarflanishi va qurilish jarayonida shaharsozlik norma talablari buzilish holatlariga yo‘l qo‘yib kelinayotganligi ta’kidlanib, aniqlangan har bir holatga nisbatan keskin chora ko‘rilishi va qonuniy javobgarlik muqarrarligi tushuntirilgan.
Bundan avval Navoiyda ta’sischisi senator bo‘lgan kompaniya qurilish ishlarida qonunbuzarlikka yo‘l qo‘ygani, Qurilish vazirligi Toshkentda bir qator ko‘p qavatli turar joy binolari noqonuniy qurilayotgani aniqlansa-da, qurilish ishlari to‘xtatilmaganini hamda Qashqadaryoda qurilish talablarini buzgan bir qancha kompaniyalarga chora ko‘rilganini ma’lum qilgani haqida xabar berilgandi.
Izoh (0)