Ijtimoiy tarmoqlarda go‘yoki Farg‘ona viloyat prokuraturasi xodimining suhbati sifatida yozib olingan audioyozuv tarqaldi. Bu haqda “Xalq so‘zi Online” xabar qildi.
Audio ikki kishining telefondagi suhbati bo‘lib, unda quyidagicha gaplar bor.
“— Assalomu alaykum, Komilovman!
— Muhriddin aka?
— Ha.
— Mana bu yerda 3 ta opa turibdi–da. Nima qilay?
— Yo‘qot, gaplashildi, yo‘qot!
— Bular ketmayapti.
— Nima deyapti?
— Mana shu yerda hozir viloyat prokurorini ushlaymiz deyapti. Ketinglar desam ham yo‘q deyapti”, — deyiladi telefon suhbatida.
Ushbu audioyozuv yuzasidan Farg‘ona viloyat prokuraturasi rasmiy bayonot berdi. Unga ko‘ra, audioyozuvda viloyat prokuraturasi binosiga biriktirilgan qo‘riqlash xizmati xodimlarining o‘zaro suhbati qayd qilingan bo‘lib, ushbu jarayonda prokuratura xodimlari ishtirok etmagan.
Hozirda Milliy gvardiya Farg‘ona viloyati Qo‘riqlash boshqarmasi tomonidan xizmat tekshiruvi o‘tkazilmoqda.
Farg‘ona viloyat prokuraturasida fuqarolarning qabuli “Jismoniy va yuridik shaxslarning murojaatlari to‘g‘risida”gi qonun talablari asosida yo‘lga qo‘yilganligi ma’lum qilingan.
Bundan avval Andijon viloyat xalq ta’limi boshqarmasi maktabda o‘qituvchi o‘quvchini kaltaklagani aks etgan videoga munosabat bildirilgani hamda Qashqadaryoda maktab o‘quvchisining sinfxonada qilgan noma’qul ishi uchun prokuraturada ishlovchi otasi jarimaga tortilgani haqida xabar qilingandi.
Izoh (0)