Toshkent shahar IIBB Jinoyat qidiruv boshqarmasi Uyushgan jinoyatchilikka va qurol bilan qonunga xilof ravishda muomala qilishga qarshi kurashish bo‘limi xodimlari tomonidan poytaxtda olib borilgan tezkor qidiruv tadbirlari davomida qurollarning noqonuniy sotilishining oldi olindi.
Ma’lum qilinishicha, poytaxtning Yashnobod tumanida 1998-yilda tug‘ilgan Rustam ismli yigit o‘qotar qurolni 2 ming dollarga sotmoqchi bo‘lganida qo‘lga olingan.
So‘roq qilinganda Rustam qurolni 1998-yilda tug‘ilgan yaqin tanishi bilan birga topganini aytgan. Shundan so‘ng qurol keyinchalik sotish uchun Ulug‘bekning uyida yashirib qo‘yilgan. Ulug‘bek uyi tintuv qilinganda APS to‘pponchasi ashyoviy dalil sifatida olib qo‘yilgan.
IIBB sud-tibbiy ekspertiza markazi xulosasiga ko‘ra, qurol otish uchun yaroqli deb topilgan.
Holat yuzasidan Jinoyat kodeksining 248-moddasi (qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) bilan jinoyat ishi qo‘zg‘atilgan. Tergov harakatlari olib borilmoqda.
Eslatib o‘tamiz, Jinoyat kodeksining 248-moddasiga muvofiq qurolni, patronlarni, o‘q-dorilarni, portlovchi moddalarni va portlatish qurilmalarini o‘z ixtiyori bilan topshirgan jismoniy va yuridik shaxs qonun hujjatlarida belgilangan javobgarlikdan ozod qilinadi.
Shuningdek, Vazirlar Mahkamasining “Ro‘yxatga olinmagan qurolni, patronlarni, o‘q-dorilarni, portlovchi moddalarni va portlatish qurilmalarini ichki ishlar organlariga o‘z ixtiyori bilan topshirish tartibi to‘g‘risidagi nizomni tasdiqlash haqida”gi qaroriga ko‘ra, jismoniy yoki yuridik shaxs ichki ishlar organlariga qurol va (yoki) ularning o‘q-dorilarini o‘z ixtiyori bilan topshirganligi uchun pul mukofoti bilan taqdirlanishi, 1974-yilgacha ishlab chiqarilgan fuqaroviy o‘qotar qurol topshirgan jismoniy shaxs esa uni imtiyozli olish huquqiga ega bo‘lishi mumkin.
Izoh (0)