Бухородаги бинонинг бир қисми қулашига сабабчи бўлган тадбиркорга нисбатан тўпланган ҳужжатлар судга тақдим этилди. Бу ҳақда Бухоро шаҳар қурилиш соҳасида ҳудудий назорат инспекцияси мутахассислари берган маълумотга таяниб «Дарё» мухбири хабар берди.
Бухоро вилоят ҳокимлиги томонидан «Дарё»га тақдим этилган маълумотга кўра, тадбиркор Баҳром Раупов шаҳарсозлик ҳужжатларини тўлиқ расмийлаштирмаган. Қурилиш соҳасида ҳудудий назорат инспекциясига тегишли тартибда хабарнома юбормасдан, шаҳарсозлик нормаларига зид равишда котлован қазиш ишларини олиб борган.
«Фуқаро Баҳром Раупов объектдаги қурилиш ишларини ўзбошимчалик билан бошлагани ойдинлашди. Шу муносабат билан унга нисбатан Маъмурий жавобгарлик тўғрисидаги кодекснинг 99-моддаси 7-банди (объектларни давлат экспертизасининг лойиҳа-смета ҳужжатларига, шу жумладан, иш ҳужжатларига доир ижобий хулосасисиз, шунингдек, қурилиш соҳасида назорат қилиш ва йўл-қурилиш ишлари сифатини назорат қилиш инспекцияларининг рухсатномасисиз қуриш) билан маъмурий жарима қўллаш учун тўпланган ҳужжатлар тўплами судга тақдим этилганини маълум қиламиз», — дейди вилоят ҳокимлиги вакили.
Қайд этиш лозим, мазкур модда билан айбланган ҳуқуқбузарнинг айби судда исботланса, фуқаролар базавий ҳисоблаш миқдорининг йигирма беш бараваридан ўттиз бараваригача, мансабдор шахслар эса эллик бараваридан (12 миллион 250 минг сўм) етмиш бараваригача (17 миллион 150 минг сўм) миқдорда жаримага тортилади.
Изоҳ (0)