Turkolog olim Andrey Kubatinning o‘limi bo‘yicha jinoiy ish ochish rad qilindi, deya xabar bermoqda Bosh prokuratura matbuot xizmati.
Qayd etilishicha, 2021-yil 28-yanvar kuni ijtimoiy tarmoqlarda (Facebook) fuqaro Klara Saxarovaning ukasi 1984-yilda tug‘ilgan Kubatin Andrey Viktorovich 2020-yil 13-oktabr kuni Zangiota tumanida joylashgan Koronavirus infeksiyasi bilan kasallangan bemorlarni davolashga mo‘ljallangan maxsus 2-sonli Zangiota shifoxonasiga yotqizilganligi, shifokorlar tomonidan o‘tkazilgan muolajalarga qaramasdan 2020-yil 29-oktabr kuni vafot etganligi va bu holatda tibbiyot xodimlarining harakatiga baho berish haqida murojaati tarqalgan.
Mazkur holat yuzasidan Zangiota tuman prokuraturasi tomonidan tergovga qadar tekshiruv harakatlari o‘tkazilib, 2021-yil 28-yanvar kuni Respublika sud-tibbiy ekspertiza ilmiy-amaliy markazi Toshkent viloyati filiali sud-tibbiyot ekspertizasida komission sud-tibbiy ekspertizasi tayinlangan.
Respublika sud-tibbiy ekspertiza ilmiy amaliy markazi Toshkent viloyati filiali komission ekspertizasining 16-sonli xulosasiga ko‘ra, 1984-yilda tug‘ilgan Andrey Kubatin COVID-19 infeksiyasi og‘ir kechishi, asorati ikki tomonlama shifoxonadan tashqari interstitsial polisegmentar pnevmoniya, nafas yetishmovchiligi 3-darajasi, endogen intoksikatsiya, o‘pka shishi, o‘pka-yurak qon tomiri yetishmovchiligi 3-darajasi, hamroh gipertoniya kasalligi, semizlik 1—2-darajasi, shuningdek, poliorgan yetishmovchilik tufayli vujudga kelgan o‘tkir o‘pka-yurak yetishmovchiligidan vafot etgan.
Shuningdek, O‘zbekiston Sog‘liqni saqlash vazirligi tomonidan o‘tkazilgan xizmat tekshiruvi xulosasida bemor Kubatinga nisbatan tashxis to‘g‘ri qo‘yilganligi ko‘rsatilgan.
Shu bilan birga, xizmat tekshiruvi hamda ekspertiza xulosalarida marhum Andrey Kubatinning o‘limiga sabab bo‘lgan holatlar, ya’ni ikki tomonlama subtotal, interstitsial zotiljam oqibatida vujudga kelgan og‘ir darajali nafas va yurak-qon tomiri yetishmovchiligi, to‘qimalar og‘ir darajadagi gipoksiyasi uning hayotlik davrida 2-sonli Zangiota maxsus klinika shifokorlari tomonidan aniqlangan bo‘lib, tekshiruv va davo muolajalari O‘zbekiston Sog‘liqni saqlash vazirligining 2020-yil 20-sentabrdagi 8-sonli “Koronavirus infeksiyasi bilan kasallangan bemorlarni profilaktika, diagnostika, davolash va reabilitatsiyasi bo‘yicha vaktinchalik milliy metodik tavsiyasi”ga asosan to‘g‘ri va asosli o‘tkazilganligi qayd etilgan.
Tergovga qadar tekshiruv natijasiga ko‘ra, tuman prokuraturasi tomonidan 2021-yil 28-fevral kuni jinoyat ishini qo‘zg‘atishni rad etish haqida qaror qabul qilingan.
Eslatib o‘tamiz, o‘zbekistonlik taniqli turkolog Andrey Kubatin 29-oktabr kuni koronavirus oqibatida vafot etgan.
Bundan avval marhum turkolog Andrey Kubatin qamoqda qattiq qiynoqlarga solingani aytilgani hamda sud marhum olim Andrey Kubatinning oilasiga kompensatsiya undirish to‘g‘risidagi da’voni rad etgani haqida xabar berilgandi.
Izoh (0)