Chexiyaning eng boy odami, PPF Group asoschisi Petr Kellner 27-mart kuni 56 yoshida Alyaskaning Ankorij shahri sharqidagi muzlikda sodir bo‘lgan Eurocopter AS50 vertolyoti ishtirokidagi aviahalokat oqibatida vafot etdi. Bu haqda Reuters nashriga tayanib, “Kommersant” xabar berdi.
Aviahalokat natijasida jami besh kishi halok bo‘ldi, oltinchi yo‘lovchi omon qoldi va og‘ir ahvolda shifoxonaga yotqizildi. Halokat sabablari aniqlanmoqda. Petr Kellnerdan tashqari, Chexiyaning yana bir fuqarosi Benjamen Laroshe, ikki nafar gid va uchuvchi halok bo‘ldi.
Mahalliy hukumat 29-mart, dushanbagacha muzlik ustidan parvoz qilishga taqiq qo‘ydi. Transport xavfsizligi bo‘yicha milliy kengash halokat sabablarini o‘rganmoqda.
Forbes Petr Kellnerning boyligini 17,5 milliard dollarga baholamoqda. Kellnerning PPF kompaniyasi Rossiya biznes loyihalariga bir necha bor investitsiya kiritgan. Xususan, 2008-yilda Petr Kellner Rossiyadagi “Eldorado” do‘konlar tarmog‘ining 80 foiz aksiyasiga egalik qilgan.
Avvalroq Fransiyaning shimoli-g‘arbida ichida fransiyalik milliarder va siyosatchi Olivye Dasso bo‘lgan vertolyot qulab tushgani haqida xabar berilgan edi. Natijada Dasso va uchuvchi halok bo‘ldi. 2020-yil Dasso Forbes jurnalining milliarderlar reytingida 4,7 milliard dollar bilan 361-o‘rinni egallagan.
Shuningdek, AQShning Aydaho shahrida UH-60 Black Hawk vertolyotining qulashi oqibatida uch harbiy uchuvchi halok bo‘ldi. Shtat Milliy gvardiyasi podpolkovnigi Kristofer Bordersning ta’kidlashicha, halokat yuz bergan joyda qor yog‘gan.
Izoh (0)