Чехиянинг энг бой одами, PPF Group асосчиси Петр Келлнер 27 март куни 56 ёшида Алясканинг Анкориж шаҳри шарқидаги музликда содир бўлган Eurocopter AS50 вертолёти иштирокидаги авиаҳалокат оқибатида вафот этди. Бу ҳақда Reuters нашрига таяниб, «Коммерсантъ» хабар берди.
Авиаҳалокат натижасида жами беш киши ҳалок бўлди, олтинчи йўловчи омон қолди ва оғир аҳволда шифохонага ётқизилди. Ҳалокат сабаблари аниқланмоқда. Петр Келлнердан ташқари, Чехиянинг яна бир фуқароси Бенжамен Лароше, икки нафар гид ва учувчи ҳалок бўлди.
Маҳаллий ҳукумат 29 март, душанбагача музлик устидан парвоз қилишга тақиқ қўйди. Транспорт хавфсизлиги бўйича миллий кенгаш ҳалокат сабабларини ўрганмоқда.
Forbes Петр Келлнернинг бойлигини 17,5 миллиард долларга баҳоламоқда. Келлнернинг PPF компанияси Россия бизнес лойиҳаларига бир неча бор инвестиция киритган. Хусусан, 2008 йилда Петр Келлнер Россиядаги «Eldorado» дўконлар тармоғининг 80 фоиз акциясига эгалик қилган.
Аввалроқ Франциянинг шимоли-ғарбида ичида франциялик миллиардер ва сиёсатчи Оливье Дассо бўлган вертолёт қулаб тушгани ҳақида хабар берилган эди. Натижада Дассо ва учувчи ҳалок бўлди. 2020 йил Дассо Forbes журналининг миллиардерлар рейтингида 4,7 миллиард доллар билан 361-ўринни эгаллаган.
Шунингдек, АҚШнинг Айдаҳо шаҳрида UH-60 Black Hawk вертолётининг қулаши оқибатида уч ҳарбий учувчи ҳалок бўлди. Штат Миллий гвардияси подполковниги Кристофер Бордерснинг таъкидлашича, ҳалокат юз берган жойда қор ёғган.
Изоҳ (0)