Armaniston bosh vaziri Nikol Pashinyan muddatidan oldingi parlament saylovlari o‘tkazilishi uchun o‘z lavozimini aprel oyida tark etadi. Bu haqda u Armavir viloyatiga uyushtirgan safari davomida Aragats qishlog‘i aholisi bilan uchrashuvda aytib o‘tdi, deb yozadi “RBK”.
“Aprel oyida men vazifamni tark etish uchun emas, balki muddatidan oldin parlament saylovlari o‘tkazilishi uchun iste’foga chiqaman. Ushbu davr mobaynida men bosh vazir vazifasini bajaruvchi sifatida faoliyatimni davom ettiraman”, — dedi Pashinyan.
Pashinyan Armaniston xalqiga murojaat qilar ekan, saylovchilar tomonidan qo‘llab-quvvatlangan taqdirda mamlakatga avvalgidan ham yaxshiroq xizmat qilishga va’da berdi. Agar fuqarolar uning jamoasini qo‘llab-quvvatlamasa, u holda Pashinyan hokimiyatni topshirishga so‘z berdi.
Armanistonda navbatdan tashqari parlament saylovlari 20-iyun kuni bo‘lib o‘tishi kutilmoqda. O‘sha vaqtga qadar Pashinyan hukumat rahbari vazifasini bajaruvchisi sifatida ish olib boradi.
Armaniston qonunlariga ko‘ra, qonun chiqaruvchi hokimiyat saylovdan so‘ng, yangi bosh vazirni saylashi kerak. Agar ikki tur natijalariga ko‘ra, Vazirlar mahkamasi rahbarligiga nomzodlarning hech biri kerakli miqdordagi ovozni to‘play olmasa, u holda parlament o‘zini o‘zi tarqatib yuboradi.
Eslatib o‘tamiz, Armanistondagi siyosiy inqiroz hamda Pashinyanning iste’fosini talab qiluvchi norozilik namoyishlari 2020-yil 10-noyabrda hukumatning Rossiya va Ozarbayjon rahbarlari bilan Tog‘li Qorabog‘dagi harbiy harakatlarni to‘xtatish to‘g‘risida qo‘shma bayonot imzolangandan so‘ng boshlandi. Ushbu shartnomaga binoan Boku Qorabog‘ hududining bir qismi ustidan nazoratni qo‘lga kiritdi. Pashinyanning siyosiy muxoliflari va oppozitsiya tarafdorlari sulh shartlaridan norozi bo‘lib, bosh vazirni Ozarbayjonga taslim bo‘lgan va o‘z xalqiga xiyonat qilganlikda aybladi. Olimlar, madaniyat arboblari, barcha katolik armanlar rohibi Garegin II, Armanistonning uch nafar sobiq prezidenti, shuningdek, Bosh shtab qo‘mondonligi Pashinyanni iste’foga chiqishga chaqirdi.
Avvalroq Armanistonda sentabrdan buyon amal qilib kelgan harbiy holat bekor qilingani haqida xabar berilgandi.
Mavzuga doir:
- Armaniston Bosh shtabi Pashinyanning iste’fosini talab qildi. Uning o‘zi buni harbiy to‘ntarishga urinish deb atadi va tarafdorlarini namoyishga chiqishga chaqirdi
- Armanistonda bosh vazirga qarshi namoyishchilar hukumat binosiga bostirib kirdi (video)
- Armaniston bosh vaziri mamlakat boshqaruvning yarim prezidentlik shakliga qaytishi mumkinligini ma’lum qildi
Izoh (0)