O‘zbekistondagi maktablarda 29-martdan 4-chorak darslari boshlanishi munosabati bilan o‘qishning masofaviy ta’lim shakliga o‘tkazilishi bo‘yicha ko‘plab savollar kelib tushayotgani sababli xalq ta’limi vaziri Sherzod Shermatov ota-onalarga murojaat bilan chiqdi.
“Shu o‘rinda, yana bir bor eslatib o‘tmoqchimiz, o‘quvchilarga qulaylik yaratish maqsadida joriy o‘quv yilida gibrid ta’lim tizimi joriy etilgan, ya’ni farzandini maktabga yuborib, an’anaviy ta’lim olishi yoki uydan bepul televizion ‘Onlayn maktab’ kanallari orqali masofaviy ta’lim olishi bo‘yicha qarorni ota-onalarning o‘zi qabul qiladi”, — deb eslatib o‘tgan vazir o‘zining rasmiy sahifasida.
Uning ta’kidlashicha, epidemiologik holat og‘irlashgan hududlarda mahalliy hokimlik organlariga karantin talablarini kuchaytirish choralarini ko‘rish vakolati berilgan. Shuni inobatga olib, hududiy hokimliklar ba’zi tumanlardagi maktablarni to‘liq masofaviy ta’lim shakliga o‘tkazish bo‘yicha qaror qabul qilishi mumkin. O‘z navbatida, maktablarning ma’muriyatiga sanitariya-gigiyena talablariga qat’iy rioya etish bo‘yicha topshiriq berilgan.
“Pandemiya nafaqat dunyo iqtisodiyoti va ta’lim tizimiga, balki insonlarning asabiga ham salbiy ta’sir ko‘rsatayotganiga guvoh bo‘lyapmiz. Shunday ekan, qadrli ota-onalar, joylarda maktab jamoasi bilan o‘zaro hurmatni saqlagan holda, faqat birgalikda ushbu vaziyatdan chiqib ketishimiz mumkinligini tushunishingizni so‘raymiz”, — degan Sherzod Shermatov.
Eslatib o‘tamiz, koronavirusga chalinish holatlari, asosan, o‘quvchilar, talabalar va tashkilot xodimlari orasida ko‘paygan. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan. Ushbu kasallik keng tarqalishining oldini olish maqsadida Toshkentdagi ayrim maktablarda o‘qish bosqichma-bosqich masofaviy shaklga o‘tkazilmoqda.
O‘zbekiston maktablarida bahorgi ta’til 20-martdan boshlangandi. Xalq ta’limi vazirligi bahorgi ta’til 28-martgacha davom etishi, 4-chorakning ilk kuni 29-mart ekanligini ma’lum qilgan.
Izoh (0)