Ўзбекистондаги мактабларда 29 мартдан 4-чорак дарслари бошланиши муносабати билан ўқишнинг масофавий таълим шаклига ўтказилиши бўйича кўплаб саволлар келиб тушаётгани сабабли халқ таълими вазири Шерзод Шерматов ота-оналарга мурожаат билан чиқди.
«Шу ўринда, яна бир бор эслатиб ўтмоқчимиз, ўқувчиларга қулайлик яратиш мақсадида жорий ўқув йилида гибрид таълим тизими жорий этилган, яъни фарзандини мактабга юбориб, анъанавий таълим олиши ёки уйдан бепул телевизион ‘Онлайн мактаб’ каналлари орқали масофавий таълим олиши бўйича қарорни ота-оналарнинг ўзи қабул қилади», — деб эслатиб ўтган вазир ўзининг расмий саҳифасида.
Унинг таъкидлашича, эпидемиологик ҳолат оғирлашган ҳудудларда маҳаллий ҳокимлик органларига карантин талабларини кучайтириш чораларини кўриш ваколати берилган. Шуни инобатга олиб, ҳудудий ҳокимликлар баъзи туманлардаги мактабларни тўлиқ масофавий таълим шаклига ўтказиш бўйича қарор қабул қилиши мумкин. Ўз навбатида, мактабларнинг маъмуриятига санитария-гигиена талабларига қатъий риоя этиш бўйича топшириқ берилган.
«Пандемия нафақат дунё иқтисодиёти ва таълим тизимига, балки инсонларнинг асабига ҳам салбий таъсир кўрсатаётганига гувоҳ бўляпмиз. Шундай экан, қадрли ота-оналар, жойларда мактаб жамоаси билан ўзаро ҳурматни сақлаган ҳолда, фақат биргаликда ушбу вазиятдан чиқиб кетишимиз мумкинлигини тушунишингизни сўраймиз», — деган Шерзод Шерматов.
Эслатиб ўтамиз, коронавирусга чалиниш ҳолатлари, асосан, ўқувчилар, талабалар ва ташкилот ходимлари орасида кўпайган. Хусусан, Тошкентдаги 77 та мактабда ўқувчилар орасида коронавирус инфекцияси аниқланган. Ушбу касаллик кенг тарқалишининг олдини олиш мақсадида Тошкентдаги айрим мактабларда ўқиш босқичма-босқич масофавий шаклга ўтказилмоқда.
Ўзбекистон мактабларида баҳорги таътил 20 мартдан бошланганди. Халқ таълими вазирлиги баҳорги таътил 28 мартгача давом этиши, 4-чоракнинг илк куни 29 март эканлигини маълум қилган.
Изоҳ (0)