Malining shimolida jangarilar harbiy bazalardan biriga hujum qildi. Oqibatda 33 nafar harbiy halok bo‘ldi. Bu haqda “Korrespondent.net” xabar berdi.
Mamlakat Mudofaa vazirligining ma’lumotlariga ko‘ra, 15-mart kuni Ansango tumanidan 60 kilometr uzoqlikda joylashgan Tessit aholi punktidagi harbiy qismga qurollangan terrorchilar hujum qildi.
“Hujum oqibatida 33 nafar harbiy hayotdan ko‘z yumdi va 14 nafari jarohatlandi, ularning sakkiz nafari og‘ir ahvolda”, — deyiladi xabarda.
Hozircha hech bir guruh hujum uchun javobgarlikni zimmasiga olgani yo‘q.
Ma’lumot uchun, 2020-yilning sentabr oyida ham 10 nafar harbiy hujum oqibatida halok bo‘lgan edi. Harbiy qurol-yarog‘ yetkazib berishga javobgar bo‘linma Gire punktida hujumga uchragan.
Oktabr oyining o‘rtalarida esa Malida BMT tinchlikparvar harbiylari bo‘lgan avtomobil portlatib yuborildi. Voqea mamlakatning shimoli-sharqidagi Kidal hududida sodir bo‘ldi. BMT halok bo‘lgan va jarohatlangan tinchlikparvar harbiylarning millatiga aniqlik kiritmadi.
Avvalroq Efiopiyaning Sharqiy Vellega provinsiyasi Oromiya hududida qurollangan odamlar Efiopiya pravoslav cherkoviga hujum qildi. Hujum oqibatida 30 ga yaqin odam halok bo‘ldi.
Nigeriyada esa qurollangan jangarilar Zamfara shtatida maktabga hujum uyushtirib, 317 nafar o‘quvchi qizni o‘g‘irlab ketdi. 26-fevral kuni tungi soat 01:45 da jinoyatchilar 20 ta mototsiklda Jangebe shahridagi davlat maktabiga kelgan. Ular qizlar yotoqxonasiga bostirib kirib, maktab hududida, taxminan, uch soat bo‘lgan va qizlarni o‘rmonga olib ketgan. Jangarilar o‘g‘irlab ketgan o‘quvchi qizlar to‘rt kundan so‘ng qutqarildi.
Izoh (0)