Turkmanistonning Toshhovuz viloyatida 10-mart kuni COVID-19’ga qarshi emlash boshlandi. Birinchi bo‘lib tibbiyot va politsiya xodimlari emlandi, deya xabar berdi “Xronika Turkmenistana”.
Hududdagi ko‘p tarmoqli viloyat kasalxonasi va yuqumli kasalliklar shifoxonasidagi aksariyat shifokorlar birinchi dozani qabul qildi. Shuningdek, preparat yo‘l-patrul xizmati politsiya xodimlari tomonidan qabul qilindi.
Ayni paytda Turkmanistonda faqat Rossiyaning ikki xil vaksinasi — “Sputnik V” va “EpiVakKorona” rasmiy litsenziyaga ega.
Biroq gazeta manbalariga ko‘ra, aholi Xitoy dori vositasi bilan emlanmoqda, vaksinaning partiyasi 6-mart kuni mamlakatga olib kelingan. Aynan qaysi vaksinadan foydalanilganini aniqlashning iloji bo‘lmagan, chunki preparatning nomi xitoycha harflarda yozilgan.
Emlash boshlanishidan oldin shaharda vaksina uchun 60 manat to‘lash kerakligi haqida mish-mish tarqaldi. Ammo birinchi inyeksiya odamlarga bepul berildi, ikkinchisining to‘lovi haqida ham xabar berilmadi.
Toshhovuz viloyatining tumanlaridagi tibbiyot muassasalariga elektron emlash kartalarini tayyorlash buyurilgan, unda aholining shaxsiy ma’lumotlari va emlangan sanasi ko‘rsatilishi kerak. Biroq tumanlarda emlash hali boshlanmagan.
Turkmanistonda mart oyining boshidan beri 3 foiz harbiy xizmatchilar — armiya qo‘mondonligi, vazirlik xodimlari, Ashxobodda va uning atrofida joylashgan harbiy qismlarning komandirlari va ofitserlari emlandi. Ular Rossiyaning “Sputnik V” vaksinasi bilan emlangan.
Avvalroq Turkmaniston aholisini koronavirusga qarshi emlashga tayyorlanayotgani haqida xabar berilgandi. Xabarga ko‘ra, emlashdan oldin odamlar analiz uchun qon topshiradi. Keyin ular bilan tushuntirish suhbati o‘tkaziladi va birinchi emlashdan 21 kun o‘tgach, ikkinchisini olish kerakligi haqida ogohlantiriladi.
Vaksinatsiyadan oldin nega qon olinishi haqida ma’lumot berilmagan. Taxminlarga ko‘ra, bu odamlarda antitana birligini aniqlash uchun. Koronavirusga qarshi antitanalarga ega bo‘lgan fuqaro emlanmaydi.
Izoh (0)