Kreml AQSh prezidenti Jo Baydenning Vladimir Putin haqidagi bayonotlarini “juda yomon” deb hisoblaydi. Bu haqda Rossiya prezidentining matbuot kotibi Dmitriy Peskov jurnalistlarga bergan intervyusida aytib o‘tdi, deb yozadi Meduza.
“Men bunga munosabat bildirish uchun ko‘p gapirib o‘tirmayman. Faqat shuni aytmoqchimanki, bu AQSh prezidentining juda yomon bayonoti bo‘ldi. U shubhasiz, mamlakatimiz bilan munosabatlarni yaxshilashni istamaydi. Buyog‘iga biz ham shundan kelib chiqib ish ko‘ramiz”, — dedi Peskov.
Peskov Vladimir Putin AQSh prezidentining bayonotiga shaxsan javob berishni rejalashtiryaptimi yoki yo‘qligi, haqida bir narsa deyolmasligini aytdi. Jurnalistlarning Kreml shunga o‘xshash holatni eslaydimi yoki yo‘qmi, degan savoliga Peskov quyidagicha javob berdi: “Bunaqasi tarixda bo‘lmagan”. Bu mamlakatlar o‘rtasidagi munosabatlarga qanday ta’sir qilishi mumkinligi haqidagi savolga u “Qandayligi kundek ravshan” deb javob berdi, ammo so‘zlarining ma’nosini ochib bermadi.
Kreml vakili hozirgi Rossiya—Amerika munosabatlarini “juda yomon” deb ta’rifladi, ammo Rossiyaning munosabatlarni buzishga tayyor yoki yo‘qligini ochiqlamadi.
Eslatib o‘tamiz, AQSh prezidenti Jo Bayden ABC telekanaliga bergan intervyusida jurnalistning “Rossiya prezidenti Vladimir Putinni qotil deb hisoblaysizmi?” — degan savoliga tasdiq javobini bergan. “Mmm, hmm, ha”, — deya javob qildi Bayden undan intervyu olayotgan Jorj Stefanopolusning savoliga.
Shuningdek, AQSh prezidenti Putin Amerikadagi saylovlarga aralashgani uchun “javob berishi”ga ishonch bildirdi.
Baydenning so‘zlariga ko‘ra, yanvar boshida u Putin bilan telefon orqali muloqot qilgan, shunda u Rossiya prezidentiga: “Men sizni bilaman, siz meni bilasiz. Agar shu narsa (Rossiya aralashuvi) rost bo‘lib chiqsa, unda (oqibatlarga) tayyor turing”, — degan.
Baydenning Putin haqidagi gaplaridan keyin Moskva birjasida Rossiya rublining kursi pasayib ketdi.
Rossiyaning AQShdagi elchisi Anatoliy Antonov maslahatlashuv uchun Moskvaga chaqirildi. U 20-mart kuni uchib kelishi kutilmoqda. Maslahatlashuvlar “AQSh bilan munosabatlar borasida qanday ish tutish va qaysi tomonga harakatlanish”ni tushunib olish maqsadida o‘tkaziladi, deya TIVda ma’lum qilingan.
Shuningdek, AQSh Milliy razvedkasi 16-mart kuni hisobot e’lon qildi, unga ko‘ra, AQShda 2020-yilgi prezident saylovlari chog‘ida Rossiya hukumati Demokratik partiya nomzodi Jo Baydenni “badnom qilish” kampaniyasini uyushtirgan.
Rossiya Tashqi ishlar vazirligining rasmiy vakili Mariya Zaxarova va Rossiya prezidentining matbuot kotibi Dmitriy Peskov Rossiya hukumatining AQShdagi saylovlarga aralashuvi haqidagi ayblovlarni butunlay rad etdi. Peskovning fikricha, hisobotni e’lon qilish orqali Rossiyaga qarshi navbatdagi, yangi sanksiyalar masalasini kun tartibiga kiritish uchun bahonaga ega bo‘lmoqchi bo‘lishgan.