Малида жангариларнинг ҳужуми оқибатида 33 нафар ҳарбий ҳалок бўлди

Малининг шимолида жангарилар ҳарбий базалардан бирига ҳужум қилди. Оқибатда 33 нафар ҳарбий ҳалок бўлди. Бу ҳақда «Korrespondent.net» хабар берди.

Мамлакат Мудофаа вазирлигининг маълумотларига кўра, 15 март куни Ансанго туманидан 60 километр узоқликда жойлашган Тессит аҳоли пунктидаги ҳарбий қисмга қуролланган террорчилар ҳужум қилди.

«Ҳужум оқибатида 33 нафар ҳарбий ҳаётдан кўз юмди ва 14 нафари жароҳатланди, уларнинг саккиз нафари оғир аҳволда», — дейилади хабарда.

Ҳозирча ҳеч бир гуруҳ ҳужум учун жавобгарликни зиммасига олгани йўқ.

Маълумот учун, 2020 йилнинг сентябрь ойида ҳам 10 нафар ҳарбий ҳужум оқибатида ҳалок бўлган эди. Ҳарбий қурол-яроғ етказиб беришга жавобгар бўлинма Гире пунктида ҳужумга учраган.

Октябрь ойининг ўрталарида эса Малида БМТ тинчликпарвар ҳарбийлари бўлган автомобиль портлатиб юборилди. Воқеа мамлакатнинг шимоли-шарқидаги Кидаль ҳудудида содир бўлди. БМТ ҳалок бўлган ва жароҳатланган тинчликпарвар ҳарбийларнинг миллатига аниқлик киритмади.

Аввалроқ Эфиопиянинг Шарқий Веллега провинцияси Оромия ҳудудида қуролланган одамлар Эфиопия православ черковига ҳужум қилди. Ҳужум оқибатида 30 га яқин одам ҳалок бўлди.

Нигерияда эса қуролланган жангарилар Замфара штатида мактабга ҳужум уюштириб, 317 нафар ўқувчи қизни ўғирлаб кетди. 26 февраль куни тунги соат 01:45 да жиноятчилар 20 та мотоциклда Жангебе шаҳридаги давлат мактабига келган. Улар қизлар ётоқхонасига бостириб кириб, мактаб ҳудудида, тахминан, уч соат бўлган ва қизларни ўрмонга олиб кетган. Жангарилар ўғирлаб кетган ўқувчи қизлар тўрт кундан сўнг қутқарилди.