Afg‘onistonning Vardak viloyatida vertolyotning qulab tushishi oqibatida to‘qqiz kishi halok bo‘ldi. Bu haqda mamlakat Mudofaa vazirligi ma’lumotiga asoslanib “RBK” xabar berdi
Xabarga ko‘ra, halok bo‘lganlar orasida to‘rt nafar ekipaj a’zosi va besh nafar harbiy xizmatchi bo‘lgan.
Afg‘onistonning Tolo News agentligining xabar berishicha, Mudofaa vazirligi voqea yuzasidan tekshiruv boshlagan. Agentlik manbasining ta’kidlashicha, vertolyot maxsus kuchlar askarlari va ular bilan birga oziq-ovqat hamda jihozlarni Bexsud shahriga yetkazib berishi kerak bo‘lgan. Manbaga ko‘ra, vertolyot qo‘nish paytida qurollangan odam tomonidan urib tushirilgan.
Shu bilan birga, Reuters manbasi va mahalliy hukumat vakili vertolyot parvoz paytida raketa bilan urib tushirilganini aytdi.
Moskvada 18-mart kuni afg‘onistonaro tartibga solish masalalari bo‘yicha Rossiya, Xitoy, AQSh va Pokiston maxsus vakillarining uchrashuvi bo‘lib o‘tishi rejalashtirilgan edi. Bu haqda 9-mart kuni Rossiya TIV rasmiy vakili Mariya Zaxarova ma’lum qilgan. Muzokaralar davomida Afg‘onistondagi mojaroni to‘xtatish, Dohadagi janjal ishtirokchilari o‘rtasida oldindan muzokaralar o‘tkazish va zo‘ravonlik darajasini pasaytirish yo‘llarini muhokama qilish rejalashtirilgan.
Shuningdek, Tolo News agentiligi Kobulda ichida hukumat xodimlari bo‘lgan avtobusning portlashi natijasida kamida to‘rt kishi halok bo‘lib, o‘n to‘rt kishi yaralangani haqida xabar berdi.
Hodisa mahalliy vaqt bilan ertalab soat 07:20 da (Toshkent vaqti bilan soat 07: 50 da) Kobulning 17-kvartalida sodir bo‘lgan. Politsiya ma’lumotlariga ko‘ra, avtobusda Aloqa va axborot texnologiyalari vazirligi xodimlari bo‘lgan. Jabrlanganlar zudlik bilan eng yaqin kasalxonaga yetkazilgan.
https://twitter.com/1TVNewsAF/status/1372432863556145152
Xabarga ko‘ra, hech qaysi guruh portlash uchun javobgarlikni o‘z zimmasiga olmadi.
Politsiya ma’lumotlarini keltirgan 1TV telekanali esa portlash kamida uch kishining o‘limiga sababchi bo‘lgani va 11 kishini jarohatlagani haqida xabar bergan.
Tolo News tomonidan to‘plangan ma’lumotlarga ko‘ra, Afg‘onistonda so‘nggi 18 kun ichida xavfsizlik bilan bog‘liq turli hodisalar tufayli 144 kishi halok bo‘lgan va 214 kishi yaralangan.
Izoh (0)