GWS Auctions maydonchasi orqali 1950-yilda ishlab chiqarilgan noodatiy tarixga ega Cadillac Fleetwood 75 sotuvga qo‘yildi. Ta’kidlanishicha, limuzindan 1972-yilda “Cho‘qintirgan ota” filmini suratga olishda foydalanilgan. Auksionda mashina narxi 100 ming dollardan boshlanadi, deb xabar beradi Motor.
Cadillac Fleetwood 75 limuzini Frensis Ford Koppolaning “Cho‘qintirgan ota” filmida bir necha bor ko‘rinish bergan. Masalan, aynan ushbu mashinada Al Pachino ijrosidagi Maykl Korleone Dayan Kiton o‘ynagan sevgilisi Key Adamsning oldiga, uchrashuvga keladi. Turli yillarda avtomobil boshqa kartinalarda ham ko‘rinish bergan, biroq ular bu qadar mashhur chiqmagan.
Bundan tashqari, mashinaga egalik qilganlar orasida Gollivud aktrisasi Mey Uest va ajoyib Krisvell taxallusi bilan mashhurlikka erishgan ekstrasens Jeron Krisuell King ham bor.
Fleetwood 75 limuziniga 190 ot kuchiga ega 5,4 litrli V8 motori o‘rnatilgan. Odatda dvigatel uch pog‘onali mexanik uzatmalar qutisi yordamida boshqarilgan, biroq uni to‘rt pog‘onali avtomat uzatmalar qutisiga ham almashtirish mumkin. Limuzin saloniga yetti kishi sig‘ishi mumkin.
Avvalroq AQShning 33-prezidentiga tegishli bo‘lgan Lincoln limuzini auksionga qo‘yilgani to‘g‘risida xabar berilgandi.
Izoh (0)