Toshkent viloyatida YPX xodimiga 5 million so‘m pora taklif qilgan haydovchi qo‘lga olindi, deya “Daryo”ga xabar bermoqda viloyat YHXB.
Qayd etilishicha, 2021-yilning 15-mart kuni O‘zbekiston IIV O‘z xavfsizlik boshqarmasining Toshkent viloyati bo‘yicha bo‘limiga Toshkent viloyati IIBB Yo‘l harakati xavfsizligi boshqarmasi, YPXB YPX maxsus otryadi, 1-safarbar guruh komandiri, kapitan D.I. bildirgi bilan murojaat qiladi.
O‘z murojaatida u 15-mart kuni YPX inspektori, safdor A.R. haydovchi B.Sh. boshqaruvidagi Lacetti ’ni tekshirish uchun to‘xtatganini, haydovchi mast holda ekani aniqlanganini va unga nisbatan tegishli tartibda ma’muriy bayonnoma rasmiylashtirilib, avtomashina jarima maydoniga qo‘yilganini bildiradi.
Mazkur holat yuzasidan haydovchi B.Sh. uning yoniga kelib, sodir etgan qoidabuzarligini yengilroq qoidabuzarlik turiga almashtirib, avtomashinasini jarima maydonchasidan chiqarib berishini, buning evaziga 5 million so‘m miqdoridagi pulni pora sifatida taklif qilayotganini, ushbu fuqaroga pora berish jinoyat ekanini tushuntirishiga qarmay, unga to‘xtovsiz pora taklif qilayotganini bildirib, haydovchiga nisbatan tegishli tartibda chora ko‘rishni so‘raydi.
YPX xodimining bildirgisi asosida, IIV O‘XB Toshkent viloyati bo‘yicha bo‘limi va Chirchiq shahar prokuraturasi xodimlari bilan hamkorlikda tezkor tadbir o‘tkazilib, jarima maydonining qorovulxonasida gumon qilingan shaxs YPX xodimiga 5 million so‘m pullarni pora tariqasida berayotgan vaqtida qo‘lga olingan.
Mazkur holat yuzasidan fuqaro B.Sh.ga nisbatan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilgan.
Samarqandda fuqaroni “ayollar daftari”ga kiritish uchun 500 dollar talab qilgan mahalla raisiga jinoyat ishi qo‘zg‘atilgani, Samarqandda IIB tergovchilari boshlig‘iga 1000 dollar pora taklif qilgan fuqaro qo‘lga olingani hamda Farg‘onada noqonuniy nikoh o‘qiganiga chora ko‘rmaslik uchun profilaktika inspektoriga 2 million so‘m pora taklif qilgan shaxs ushlangani haqida xabar berilgandi.
Izoh (0)