Walt Grace Vintage saytida noodatiy Lamborghini Countach sotuvga qo‘yilgani to‘g‘risida e’lon paydo bo‘ldi: u 25th Anniversary seriyasidagi 657 ta nusxadan biri hisoblanadi. Sotuvga qo‘yilgan mashina 425 ming dollarga baholanmoqda. 1989-yildan buyon mashina faqatgina ming kilometr yo‘l bosgan, deb xabar beradi Motor.
Original qizil Rosso Siviglia rangidagi kupe “gilyotina” eshiklar bilan jihozlangan, saloni esa qora charm bilan qoplangan bo‘lib, hozirga qadar ideal holatda saqlangan. Sotuvchining ta’kidlashicha, avtomobil hozirga qadar restavratsiya qilinmagan. Countach 455 ot kuchiga ega 5,2 litrli V12 dvigateli yordamida harakatga keladi, agregat esa besh pog‘onali mexanik uzatmalar qutisi yordamida boshqariladi. 32 yillik superkar soatiga 100 kilometr tezlikka 4,5 soniyada erishadi, maksimal tezligi — 298 kilometr/soat.
Ayni vaqtda avtomobil Mayamidagi Walt Grace Vintage avtosalonida saqlanmoqda.
25th Anniversary cheklangan seriyasi kompaniyaning birinchi seriyali avtomobilining 25 yilligi munosabati bilan chiqarilgan bo‘lib, undan 657 nusxa o‘rin olgan. 350 GT modeli 1964-yilda sotuvga chiqqan. 1974-yildan 1990-yilga qadar Lamborghini 1,9 mingdan ortiq Countach modellarini taqdim etgan.
Avvalroq Gooding & Company auksioni orqali noyob Lamborghini Countach LP400 Periscopica sotuvga qo‘yilgani to‘g‘risida xabar berilgandi.
Izoh (0)