АҚШда «Чўқинтирган ота» фильмидаги Cadillac лимузини аукционга қўйилди

GWS Auctions майдончаси орқали 1950 йилда ишлаб чиқарилган ноодатий тарихга эга Cadillac Fleetwood 75 сотувга қўйилди. Таъкидланишича, лимузиндан 1972 йилда «Чўқинтирган ота» фильмини суратга олишда фойдаланилган. Аукционда машина нархи 100 минг доллардан бошланади, деб хабар беради Motor.

Cadillac Fleetwood 75 лимузини Фрэнсис Форд Копполанинг «Чўқинтирган ота» фильмида бир неча бор кўриниш берган. Масалан, айнан ушбу машинада Аль Пачино ижросидаги Майкл Корлеоне Дайан Китон ўйнаган севгилиси Кэй Адамснинг олдига, учрашувга келади. Турли йилларда автомобиль бошқа картиналарда ҳам кўриниш берган, бироқ улар бу қадар машҳур чиқмаган.

Бундан ташқари, машинага эгалик қилганлар орасида Голливуд актрисаси Мэй Уэст ва ажойиб Крисвелл тахаллуси билан машҳурликка эришган экстрасенс Жерон Крисуэлл Кинг ҳам бор.

Fleetwood 75 лимузинига 190 от кучига эга 5,4 литрли V8 мотори ўрнатилган. Одатда двигатель уч поғонали механик узатмалар қутиси ёрдамида бошқарилган, бироқ уни тўрт поғонали автомат узатмалар қутисига ҳам алмаштириш мумкин. Лимузин салонига етти киши сиғиши мумкин.

Аввалроқ АҚШнинг 33-президентига тегишли бўлган Lincoln лимузини аукционга қўйилгани тўғрисида хабар берилганди.