Sirdaryoda haydovchi bilan muloqotda Vazirlar Mahkamasi nizomi va ichki ishlar vazirining me’yoriy buyurig‘idan chetga chiqqan YPX xodimi jazolandi, deya xabar qilmoqda YHXBB.
Ma’lum qilinishicha, 2021-yilning 8-fevral kuni ijtimoiy tarmoqda “Sirdaryoda qarg‘aydigan ‘GAI’ xodimi” sarlavhasi ostidagi videolavha tarqalgan.
Videolavhada Sirdaryo viloyati IIB YHXB YPX xodimi I.Y. haydovchi bilan o‘zaro muloqot vaqtida O‘zbekiston Vazirlar Mahkamasining 2018-yil 1-dekabrdagi 975-sonli qarori bilan tasdiqlangan nizom hamda ichki ishlar vazirining me’yoriy buyrug‘i talablaridan chetga chiqqanligi holati aks etgan.
Mazkur videolavha yuzasidan Sirdaryo viloyati IIB YHXB tomonidan xizmat tekshiruvi o‘tkazilgan.
Tekshiruv xulosasiga ko‘ra, O‘zbekiston Sog‘liqni saqlash vazirligi, O‘zbekiston Ichki ishlar vazirligi, O‘zbekiston Oliy sudi, O‘zbekiston Bosh prokuraturasining “Transport vositalari haydovchilarining mast holatda ekanligini aniqlash tartibi to‘g‘risidagi nizomni tasdiqlash haqida”gi qarori bilan tasdiqlangan nizom hamda ichki ishlar vazirining tegishli buyrug‘i talablarini buzganligi uchun Sirdaryo viloyati IIB YHXB YPX otryadi birinchi safarbar guruhi YPX inspektori I.Y.ga nisbatan lavozim maoshining 30 foiz miqdorida jarima jazosi e’lon qilindi.
Bundan avval Toshkentning Do‘mbirobod dahasidagi chorrahada yuzaga kelgan tirbandlikni bartaraf etgan 11 yoshli bola voqea qanday bo‘lganini so‘zlab bergani, Qo‘qonda YPX xodimini mashina ustida sudrab ketgan haydovchi 1,5 yilga qamalgani hamda Sirdaryoda ichki ishlar xodimi kiyimida raqsga tushgan yigit 8 sutkaga qamalgani haqida xabar berilgandi.
Izoh (0)