Xorvatiyada AstraZeneca vaksinasi bilan emlangandan keyin 91 yoshli ayol vafot etdi. Bu haqda mahalliy Dori vositalari va tibbiyot mahsulotlari agentligiga tayanib, “Korrespondent.net” xabar berdi.
Ta’kidlanishicha, bemor o‘pka emboliyasi tufayli vafot etgan. Avvalroq u AstraZeneca vaksinasi bilan emlangan edi.
“Hozirda vaksinatsiya va o‘lim o‘rtasidagi bog‘liqlikni aniqlashning iloji bo‘lmayapti, shuning uchun uni aniqlash uchun qo‘shimcha hujjatlar talab qilinmoqda”, — deyiladi xabarda.
Ma’lumot uchun, oldinroq AstraZeneca kompaniyasi vaksinasining nojo‘ya ta’siri ro‘yxati kengaytirilgan edi. Xususan, ro‘yxat anafilaktik reaksiya va allergik sezgirlikni o‘z ichiga oladi.
Daniya, Norvegiya, Tailand va Bolgariya hukumati ham vaksinatsiyadan keyin bir nechta bemorlarda tromblar paydo bo‘lgani sababli AstraZeneca bilan COVID-19’ga qarshi emlash kampaniyasini to‘xtatib qo‘ygan edi.
Lekin Yevropa dori-darmon vositalari agentligi AstraZeneca bilan emlash qon quyulishi xavfini oshirmaydi va emlashni davom ettirish mumkinligini qayd etdi.
Avvalroq Jahon sog‘liqni saqlash tashkiloti (JSST) AstraZeneca kompaniyasining koronavirusga qarshi vaksinasidan foydalanishni to‘xtatishga sabab yo‘q, deb hisoblashini ma’lum qilgan edi.
Izoh (0)