Armaniston prezidenti Armen Sarkisyan tibbiy tekshiruvlardan keyin yana o‘z ishiga qaytdi. Bu haqda mamlakat prezidentining matbuot xizmatiga tayanib, “TASS” xabar bergan.
“Prezident tibbiyot markazida tekshiruvlardan o‘tdi. Ko‘rik yakuniga yetdi va davlat rahbari odatiy ish tartibiga qaytdi”, – deyiladi xabarda.
Avvalroq Sarkisyanning koronavirus infeksiyasidan tuzalganidan keyin kasallik asoratlaridan aziyat chekayotgani va yurakni stendlash amaliyotini o‘tkazish uchun kasalxonaga yotqizilgani haqida xabar berilgandi.
Armaniston prezidenti 13-mart kuni bosh vazir Nikol Pashinyan bilan mamlakatdagi siyosiy inqirozdan chiqish bo‘yicha maslahatlashuvlar o‘tkazishni rejalashtirgani ma’lum qilingan edi. Biroq Pashinyan Sarkisyanning taklifiga javob qaytarmagan. “Vatanni qutqarish uchun harakat” muxolifat birlashmasi Vazirlar Mahkamasi tarkibi iste’fo bersa mazkur masalahatlashuvlarda ishtirok etishga tayyorligini bildirgan.
Parlamentdagi muxolifat fraksiya vakillari ham 13-mart kuni prezident, bosh vazir va mamlakatdagi boshqa siyosiy kuchlar bilan muzokara olib borishga tayyorligini qayd etgan.
Eslatib o‘tamiz, Armaniston prezidentining matbuot xizmati 2021-yil 5-yanvarda Londonda Yangi yil bayramini oilasi bilan nishonlagan Sarkisyanning koronavirusga chalinganini tasdiqlagan. Armaniston davlat rahbari fevral boshida mamlakatga qaytgan va o‘z uyida COVID-19’dan davolanishni davom ettirgan edi.
2021-yil 1-martda Armanistonda bosh vazirga qarshi namoyishchilar hukumat binosiga bostirib kirgan, keyinchalik Yerevanda politsiya Armaniston prezidenti Armen Sarkisyanning qarorgohini qat’iy qo‘riqlov ostiga olgandi. Armaniston prezidenti bosh vazir Nikol Pashinyan tomonidan taklif qilingan Bosh shtab boshlig‘i Onik Gasparyan iste’fosi haqidagi farmon loyihasini ikki marta rad etgan, Bosh shtab boshlig‘i qonuniy tartibda lavozimidan ozod etilgan.
Farmon e’lon qilingandan so‘ng, mamlakat rahbari Armen Sarkisyan Konstitutsiyaviy sudga murojaat qilib, undan 2018-yilda kiritilgan “Harbiy xizmat va harbiy xizmatchilarning maqomi to‘g‘risida”gi qonunga kiritilgan o‘zgartirishlarning konstitutsiyaga muvofiqligini tekshirishni so‘ragan.
Izoh (0)