Slovakiya sog‘liqni saqlash vaziri Marek Kraychi Rossiyaning “Sputnik V” vaksinasi sotib olinishi tufayli hukumatda yuzaga kelgan kelishmovchiliklarga nuqta qo‘yish uchun iste’foga chiqdi, deb yozadi Meduza.
Slovakiya bosh vaziri Igor Matovich Kraychiga sog‘liqni saqlash vaziri sifatida qilgan mehnatlari uchun minnatdorlik bildirdi va uning ishdan ketishini “tarixdagi eng mantiqsiz iste’fo” deb atadi.
Slovakiya Yevropa Ittifoqida “Sputnik V”ni Yevropa dori-darmon agentligi (EMA) ma’qullashidan oldin tasdiqlagan Vengriyadan keyingi ikkinchi mamlakatga aylangandi. Vaksinaning birinchi partiyasi mamlakatga 1-mart kuni yetib kelgan.
“Sputnik V”ga buyurtma berish Slovakiyaning hukmron koalitsiyasida tortishuvlarga sabab bo‘ldi. Koalitsiyadagi to‘rtta partiyadan ikkitasi EMA’ning ruxsatini kutishni talab qildi. Ular Kraychi va Matovichning iste’fosini talab qilib, ularga koalitsiyadan chiqib ketish bilan tahdid qildi. Muhokamalardan so‘ng koalitsiya a’zolari faqat Kraychining iste’fosi yetarli bo‘lishiga e’tiroz bildirdi.
Eslatib o‘tamiz, 3-mart kuni Slovakiya bosh vaziri Matovich koronavirusga qarshi “Sputnik V” vaksinasi evaziga Rossiyaga Ukrainaning Zakarpatye viloyatini bermoqchiligini aytib, hazil qilgandi. Ukraina tashqi ishlar vazirligi Matovichdan aytgan so‘zlari uchun rasmiy ravishda kechirim so‘rashni talab qildi. Matovich “noo‘rin gapi” uchun “barcha ukrainaliklardan” kechirim so‘radi.
Jons Hopkins universiteti ma’lumotlariga ko‘ra, pandemiya boshidan beri Slovakiyada 331 ming kishi koronavirusga chalingan, 8 mingdan ziyod kishi kasallikdan vafot etgan. Mart oyida Yevroittifoq mamlakatlari ichida infeksiyadan eng ko‘p o‘lim holati Slovakiyada qayd etildi.
Avvalroq mamlakatda 3-martdan komendantlik soati joriy etilishi va aholiga respirator taqish majburiyati yuklanishi haqida xabar berilgandi.
Izoh (0)