AQSh yo‘l xavfsizligi sug‘urta instituti (IIHS) ekspertlari haydovchilar hushyorligini tekshirishning noodatiy usulini o‘ylab topdi. Yo‘llardagi haydovchilar zamonaviy assistentlardan foydalanish vaqtida chalg‘ish yoki chalg‘imasligini aniqlashda ular ulkan paxmoq ayiq o‘yinchog‘idan foydalanishga qaror qilgan. Test ishtirokchilarining vazifasi shunchaki uni yodida saqlab qolish bo‘lgan, biroq hamma ham buning uddasidan chiqa olmagan, deb yozadi Motor.
IIHS’dagilarning ta’kidlashicha, ular uchun testni o‘tkazishda yorqin, biroq u qadar diqqatni tortmaydigan narsa kerak bo‘lgan — bu kabi predmet yo‘lda avariya xavfini yuzaga keltirishi mumkin. Natijada ekspertlar pushti ayiqdan yaxshiroq narsa topa olmagan va unga neon-sariq kurtka hamda shapka kiygizgan.
IIHS testida ishtirok etgan 31 nafar haydovchi 2019-yilgi Mercedes-Benz C300’da bir soatga yaqin harakatlangan. Haydovchilarning birinchi guruhi elektron assistent bilan yaxshi tanish hisoblangani sabab test Mercedes’ida ham undan foydalangan. Bu kabi tizimni oldin uchratmagan ikkinchi guruh ham shu ishni qilgan, uchinchi guruh esa yordamchisiz harakatlangan.
Test davomida pushti ayiq o‘rnatilgan krossover C300’dagi har bir haydovchini uch marotabadan quvib o‘tgan va ular qarshisida 30 soniyaga yaqin harakatlangan. Mercedes’ga o‘rnatilgan kameralar yumshoq o‘yinchoq bilan “uchrashuv” vaqtida haydovchilarning e’tibori qayerga qaratilganini tushunishga yordam bergan.
Aniqlanishicha, elektronikadan foydalanish borasida tajribasiz bo‘lgan haydovchilar boshqa guruhdagilarga qaraganda ayiqni ikki marta ko‘proq payqamay qolgan. Shu bilan birga, muntazam avtopilotdan foydalanadigan haydovchilarning deyarli barchasi ayiqni ko‘rganini aytgan va oldilaridan necha marta o‘tganini sanagan. Mashinadagi kameralar tajribali haydovchilar ko‘proq yon-atrofga qaraganini ko‘rsatgan, boshqalarning nigohi esa to‘g‘ri yo‘nalishda bo‘lgan.
Boshqaruvda yordam beradigan elektron assistentlar zamonaviy seriyali avtomobillarga o‘rnatilgan bo‘lib, SEA International klassifikatsiyasi bo‘yicha avtomatlashtirishning ikkinchi darajasidan oshmaydi. Unga ko‘ra, haydovchidan talab etilmaydigan to‘laqonli avtopilot beshinchi darajaga mos keladi.
Ikkinchi darajaga ega avtopilotli avtomobillar mustaqil burilishi, tezlashishi yoki tormozlanishi, oraliq masofani saqlashi mumkin. Biroq ular doim haydovchi nazorati ostida bo‘lishi kerak.
Izoh (0)