АҚШ йўл хавфсизлиги суғурта институти (IIHS) экспертлари ҳайдовчилар ҳушёрлигини текширишнинг ноодатий усулини ўйлаб топди. Йўллардаги ҳайдовчилар замонавий ассистентлардан фойдаланиш вақтида чалғиш ёки чалғимаслигини аниқлашда улар улкан пахмоқ айиқ ўйинчоғидан фойдаланишга қарор қилган. Тест иштирокчиларининг вазифаси шунчаки уни ёдида сақлаб қолиш бўлган, бироқ ҳамма ҳам бунинг уддасидан чиқа олмаган, деб ёзади Motor.
IIHS’дагиларнинг таъкидлашича, улар учун тестни ўтказишда ёрқин, бироқ у қадар диққатни тортмайдиган нарса керак бўлган — бу каби предмет йўлда авария хавфини юзага келтириши мумкин. Натижада экспертлар пушти айиқдан яхшироқ нарса топа олмаган ва унга неон-сариқ куртка ҳамда шапка кийгизган.
IIHS тестида иштирок этган 31 нафар ҳайдовчи 2019 йилги Mercedes-Benz C300’да бир соатга яқин ҳаракатланган. Ҳайдовчиларнинг биринчи гуруҳи электрон ассистент билан яхши таниш ҳисоблангани сабаб тест Mercedes’ида ҳам ундан фойдаланган. Бу каби тизимни олдин учратмаган иккинчи гуруҳ ҳам шу ишни қилган, учинчи гуруҳ эса ёрдамчисиз ҳаракатланган.
Тест давомида пушти айиқ ўрнатилган кроссовер C300’даги ҳар бир ҳайдовчини уч маротабадан қувиб ўтган ва улар қаршисида 30 сонияга яқин ҳаракатланган. Mercedes’га ўрнатилган камералар юмшоқ ўйинчоқ билан «учрашув» вақтида ҳайдовчиларнинг эътибори қаерга қаратилганини тушунишга ёрдам берган.
Аниқланишича, электроникадан фойдаланиш борасида тажрибасиз бўлган ҳайдовчилар бошқа гуруҳдагиларга қараганда айиқни икки марта кўпроқ пайқамай қолган. Шу билан бирга, мунтазам автопилотдан фойдаланадиган ҳайдовчиларнинг деярли барчаси айиқни кўрганини айтган ва олдиларидан неча марта ўтганини санаган. Машинадаги камералар тажрибали ҳайдовчилар кўпроқ ён-атрофга қараганини кўрсатган, бошқаларнинг нигоҳи эса тўғри йўналишда бўлган.
Бошқарувда ёрдам берадиган электрон ассистентлар замонавий серияли автомобилларга ўрнатилган бўлиб, SЕА International классификацияси бўйича автоматлаштиришнинг иккинчи даражасидан ошмайди. Унга кўра, ҳайдовчидан талаб этилмайдиган тўлақонли автопилот бешинчи даражага мос келади.
Иккинчи даражага эга автопилотли автомобиллар мустақил бурилиши, тезлашиши ёки тормозланиши, оралиқ масофани сақлаши мумкин. Бироқ улар доим ҳайдовчи назорати остида бўлиши керак.
Изоҳ (0)