Noodatiy taom — xamir ichida pishgan tovuq oyoqlari

Qarsildoq xamirli qopcha ichida mazali go‘sht, xushbo‘y qo‘ziqorin va yumshoqqina kartoshka pyuresi yashiringan.

Kerakli mahsulotlar:

• kartoshka — 750 gramm;
• sarimsoq — 2 bo‘lak;
• lavr yaprog‘i — 3 dona;
• tovuq oyog‘i — 6 dona;
• piyoz — 2 dona;
• o‘simlik yog‘i — 2 osh qoshiq;
• qo‘ziqorin — 300 gramm;
• sut — 50 ml;
• sariyog‘ — 30 gramm;
• oshirilmagan xamir — 500 gramm;
• tuxum — 1 dona;
• un — 1 osh qoshiq;
• maydalangan muskat yong‘og‘i — bir chimdim;
• maydalangan murch;
• shivit;
• kunjut;
• tuz.

1. Kartoshkani archib, katta kub shaklida to‘g‘rang. Sarimsoqni po‘stidan tozalang.
2. Kartoshka va sarimsoqni qozonga solib, lavr yaprog‘ini ham qo‘shing. Ustidan issiq suv quyib, 20-25 daqiqa qaynating.
3. Tovuq oyoqlariga tuz va murch seping. Tovaga 1 osh qoshiq o‘simlik yog‘i solib, ikki tomonini qizartirib qovuring.
4. Piyozni to‘g‘rab, qolgan yog‘da tillarangga kirguncha qovuring. Qo‘ziqorinlarni ham mayda kub shaklida to‘g‘rang.
5. Qovurilgan piyozga qo‘ziqorinni qo‘shing. Tuz, murch solib, 7-8 daqiqaga dimlang.
6. Pishgan kartoshkaning suvini to‘kib, lavr yaprog‘ini olib tashlang. Qozonga iliq sut va sariyog‘ solib, kartoshkani pyure holiga keltiring.
7. Shivitni mayda to‘g‘rang. Pyurega qo‘ziqorinli piyoz, shivit, yong‘oq, tuz, murch solib, yaxshilab aralashtiring.
8. Pechni 180 darajaga qizdirib, pech patnisiga pergament qog‘oz soling.
9. Qog‘oz ustiga ozgina un sepib, xamirni 6 bo‘lakka bo‘ling. Har birini 15-20 smlik diametrda yoying.
10. Yoyilgan xamir ustiga 2-3 osh qoshiq pyure solib, tovuq oyog‘ini tikka qilib qo‘ying.
11. Oyoqlarga pyure surting, xamir chetlarini yig‘ib, hosil bo‘lgan xamirli qopchani ip bilan bog‘lang.
12. Qopchalarni yotqizib, ustiga tuxum surting, kunjut seping. Tovuq oyog‘idagi suyakni folga qog‘ozi bilan o‘rab qo‘ying.
13. Tayyor bo‘lgan qopchalarni qizigan pechda 30-35 daqiqada pishirib oling