AQShning sobiq prezidenti Donald Tramp tarafdorlari orasida ommalashgan hamda 6-yanvar kungi Vashingtondagi tartibsizliklar tufayli Apple, Google va Amazon kompaniyalari tomonidan bloklangan Parler ijtimoiy tarmog‘i yana ish boshladi. Bu haqda “RBK” xabar berdi.

Foto: AP

“Parlerni tajribali jamoa boshqaradi va biz uni tark etmoqchi emasmiz... Tarmoq so‘z erkinligi, shaxsiy hayot daxlsizligi va fuqarolik muloqotiga sodiq qolgan yetakchi ijtimoiy media platformasi sifatida rivojlanadi”, — dedi kompaniyaning vaqtinchalik bosh direktori Mark Mekler.

Meklerning aniqlik kiritishicha, xizmat AQShning axborot texnologiyalari sohasidagi yetakchi kompaniyalariga bog‘liq bo‘lmagan serverlarda o‘z faoliyatini davom ettirgan. Ular orasida Google’ga egalik qiluvchi Alphabet, Amazon, Facebook, Microsoft va Apple kompaniyalari bor.

Bungacha Amazon Parler’ga xosting xizmatlarini ko‘rsatgan, ammo Vashingtondagi tartibsizliklar ortidan kompaniya ijtimoiy tarmoqni o‘z serverlaridan uzib qo‘ygan. Amazon Parler’ga tarmoqda “zo‘ravonlikka undovchi” 98 ta post topilganini aytgan va cheklov yo‘qligi tufayli ijtimoiy tarmoqdagi bunday tarkib hajmi o‘sib borayotganini ta’kidlagan. Serverlardan uzilgandan so‘ng, Parler tarmoqni “siyosiy ruhda” o‘chirgani uchun Amazon’ni sudga berdi, ammo sud da’voni rad etdi.

“Sayt ushbu hafta davomida faqat avvalgi foydalanuvchilar uchun ochiq bo‘ladi, yangi foydalanuvchilar esa keyingi hafta ro‘yxatdan o‘tishi mumkin”, — dedi Mekler. Parler o‘zining veb-xosti sifatida Amazon o‘rnini qaysi kompaniya egallaganiga aniqlik kiritmadi. Kompaniya ma’lumotlariga ko‘ra, Parler saytdagi faoliyatini qayta tiklaydi. Dastur hali Google Play Store va App Store’ga qayta joylashtirilmagan.

Ma’lumot uchun, Parler 2018-yilda tashkil etilgan va senzurasiz Twitter sifatida tanilgan. AQShdagi 2020-yilgi prezidentlik saylovlaridan so‘ng, u amerikalik o‘ng qanot faollar orasida mashhurlikka erishgan va bir muncha vaqt Amerika App Store’da eng ko‘p yuklab olingan dastur bo‘lgan.

6-yanvar kuni AQShning o‘sha paytda amalda bo‘lgan prezidenti Donald Trampning tarafdorlari Kapitoliyga bostirib kirgandan so‘ng, Apple va Google Parler’ni o‘zlarining do‘konlaridan olib tashlagan. Ijtimoiy tarmoqlar uchun xosting xizmatlarini ko‘rsatuvchi Amazon o‘z serverlaridan Parler’ni uzishini e’lon qilgan.

Parler kengashi 29-yanvar kuni tarmoqning ijrochi direktori Jon Matseni kompaniyadan haydagan.