Facebook Avstraliya aholisi va OAVlariga tarmoqda yangiliklar bilan bo‘lishishni taqiqladi

Facebook ijtimoiy tarmog‘i avstraliyalik foydalanuvchilar va ommaviy axborot vositalarini tarmoqda mahalliy va xalqaro yangiliklarni ulashish imkoniyatidan mahrum qildi. Bunga qabul qilinishi kutilayotgan qonun sababchi bo‘lgan, unga ko‘ra, yangiliklar ulashilgan taqdirda Facebook, Google va boshqa platformalar o‘z kontentlari uchun OAVga pul to‘lashi kerak, deb yozmoqda Meduza.

Facebook bayonotida aytilishicha, Avstraliya OAVlari va aholisiga ijtimoiy tarmoqda yangilik havolalarini joylashtirish hamda mahalliy va xalqaro yangiliklarni ko‘rish taqiqlanadi. Boshqa mamlakatlarda ham Facebook orqali Avstraliya yangiliklarini ko‘rish va ularning kontentiga havolalarni joylashtirish cheklangan.

Shu bilan birga, ilgari mazkur yangi qonunga qarshi bo‘lgan Google OAV noshirlari bilan ularning kontentini pulga joylashtirish bo‘yicha shartnomalar tuza boshlagandi. Masalan, kompaniya Rupert Murdoch News Corporation media xolding bilan kelishuv imzolagan. Unga ko‘ra, xolding qo‘l ostidagi nashrlarning yangiliklarga oid materiallarini Google News Showcase’da joylashtirish uchun pul to‘laydi. Kelishuv The Sun, The Wall Street Journal, The Times va The Australian nashrlarining maqolalarini o‘z ichiga oladi. Bitimning moliyaviy shartlari oshkor qilinmagan.

Google, shuningdek, o‘zining “mahsulot”larida yangiliklarni ulashish uchun, Avstraliyaning eng yirik media kompaniyasi Nine Entertainment bilan shartnoma tuzdi. OAV ma’lumotlariga ko‘ra, Google buning uchun yiliga 30 million dollar to‘lashga rozi bo‘lgan.

Platformalarga media-kontent uchun OAVlarga pul to‘lash majburiyatini yuklaydigan qonun tez orada qabul qilinishi kutilmoqda.

Kanberra universiteti ma’lumotlariga ko‘ra, Avstraliya aholisining kamida 39 foizi yangiliklarni Facebook orqali oladi.

Avvalroq Telegram asoschisi Pavel Durov Telegram’da huquq-tartibot idoralari xodimlari haqida ma’lumot beruvchi kanallar bloklanganini ma’lum qilgandi. Bunga sabablardan biri sifatida ushbu kanallarda zo‘ravonlikka chaqiriqlar borligini ko‘rsatgan. Shuningdek, ushbu kanallarning mavjudligi messenjerning iOS versiyasi uchun favqulodda yangilanish funksiyasining ishlashiga imkon bermagan. Durovning yozishicha, Apple bunga norozilik bildirgan va Telegram ma’muriyati “muammoli kanallarni bloklashga” qaror qilgan.

Eslatib o‘tamiz, 16-fevral kuni Parler ijtimoiy tarmog‘i faoliyatini qayta tikladi. Tarmoq Tramp tarafdorlari orasida ommalashgani hamda 6-yanvar kungi Vashingtondagi tartibsizliklar tufayli Apple, Google va Amazon kompaniyalari tomonidan bloklangandi. Tarmoqning ijrochi direktori Jon Matse esa Parler kengashi tomonidan 29-yanvar kuni kompaniyadan haydalgan edi.